कैलारी–१ मनाउँमे विफेक रोज काल्ह छाला रोग सम्बन्धी चेकजाँच तथा राेग पहिचान शिविर हुइना

पहुरा समाचारदाता
हसुलिया, ४ असार । कैलाली जिल्लाके कैलारी गाउँपालिका वडा नम्बर १ स्थित मनाउँ आधारभूत स्वास्थ्य केन्द्रमे विफेक रोज (५ गते) छाला रोग जाँच शिविर हुइना बा ।

कैलारी गाउँपालिका स्वास्थ्य शाखाके समन्वय तथा स्वास्थ्य कार्यालय धनगढी कैलालीके आयोजनामे एक दिने छाला रोज जाँच शिविर हुइना हुइल हो । उ शिविर संचालनके लाग मगर ओ बुधके रोेज महिला स्वास्थ्य स्वम सेविका तथा स्वास्थ्यकर्मीहुक्रे घरभेट करल स्वास्थ्य कार्यालय कैलालीके प्रयोगशाला निरिक्षक दिपक जोशी बटैलै । उहाँ कहलै, हमार डेहिम कुछ दाद रहठ । हम्रे खुञ्जली हो कहिके मल्हम लगैठी । कबु कबु नैचोखैना दाद, कुष्ठरोगफे हुई सेकठ । हमार योजना उ दाड जरसे चोखुइना हो । कबु कबु उ कुष्ठरोगफे हुई सेकठ मने हम्रे लापारवाही करठी ।

कुष्ठरोग लागल व्यक्ति एक्के चो औषधी खैले यी रोग नैसर्ना बटैलै । बेलामे उपयुक्त उपचार नैहुइलेसे कुष्ठरोगके कारण अंगभंग वा विचलन हुइना ओरसे यी रोगहे चासोके रुपमे लेहे पर्ना बटैलै । यी रोगके कारण कौनोफे व्यक्ति शारिरीक, मानसिक एवं सामाजिक रुपमे हतोत्साहित हुइना करठै । यी रोग आँखीसे नैडेख्ना सुक्ष्म किटाणु माइक्रोव्याकटेरियम लेप्रेसे हुइना करठ । १०० जाने व्यक्तिमे किटाणु प्रवेश करलेसे ३ जनहनमे केल्ह यी रोग लग्ना सम्भावना रहठ । यकर लक्षण २ से ५ बर्ष पाछे ओ कुहीहे आउर पाछे देखैना करठ ।

कुष्ठरोगके लक्षण शरिरमे दाग, हातगोर झमझम कैना, शरिरके कौनो भागमे स्पर्श शक्ति हेराइल, हातगोरक अंगरी कम्जोर हुइना, बांग हुइना, आँखी झिमकाइ नैसेक्ना, बन्द करे नैसेक्ना, कानके लोटी मोट हुइना, अनुहारके छाला लाल हुइना, चम्किलो, शरिरमे गिर्खा, नैबठैना घाउ, मांसपेशी कम्जोर हुइना लक्षण डेखा पर्ना प्रयोगशाला निरिक्षक जोशी बटैलै ।

कैलारी गाउँपालिका स्वास्थ्य शाखा प्रमुख नरेश कुमार चौधरी वडा नम्बर १ कुष्ठरोगके जोखिम रहल बटैलै । उहाँ कहलै, यी वडामे १४ बर्ष तरेकमे कुष्ठरोग डेखपरलपाछे उच्च जोखिम डेखल हो ।

छाला सम्बन्धी रोग, कुष्ठरोग तथा क्षयरोगके नयाँ विमारी खोजपडतालके लाग आज ५ गते (विफेक रोज) शिविर संचालन हुइना ओरसे कुछ समस्या डेखल बा कलेसे चेकजाँच करैना आग्रह करलै । रोग लागके उपचार कैनासे मजा रोग लागे नैदेना हो । समयमे चेकजाँच करलेसे रोगसे बाँचे सेक्ना बटैलै ।