चैतन्यमे प्राकृतिक जीवनशैली विषयक अभिभावक उत्प्रेरणात्मक कार्यक्रम
पहुरा समाचारदाता
धनगढी, ७ असार । विश्व योग तथा विश्व सङ्गित दिवसके अवसरमे चैतन्य पाठशालाके आयोजनामे प्राकृतिक जीवनशैली विषयक अभिभावक उत्प्रेरणात्मक कार्यक्रम (‘योग, ध्यान, सङ्गित ओ सहृदयताके संगम’ शनिच्चरके रोज सफलतापूर्वक सम्पन्न हुइल बा ।
प्रमुख वक्ता आयुर्वेदिक चिकित्सक डा. प्रीति ज्ञवाली ओ पतञ्जली योग समिति सुदूरपश्चिम प्रदेशके वैद्य हेमन्तराज ओझा योग, ध्यान ओ प्राकृतिक जीवनशैलीके अभ्यासबारे जानकारी डेहल रहिट । सङ्गित, आयुर्वेद ओ योगमार्फत आत्म–संवेदनशीलता, सन्तुलित जीवनशैली ओ संस्कारके महत्वबारेफे जानकारी डेहल रहिट । ।
कार्यक्रममे प्रमुख आकर्षणके रूपमे योग, ध्यान, स्वस्थ जीवनशैली, सकारात्मक सोच तथा संस्कारबारे गहन प्रस्तुति ओ अनुभव साथे टमान विषयमे विशेष सत्र सञ्चालन करल रहे ।
चैतन्य पाठशालाके अध्यक्ष गणेश प्रसाद जोशी वर्तमान समयमे संस्कारसहितके शिक्षा अपरिहार्य रहल ओ चैतन्य पाठशालासे समय सुहाउदौ शिक्षा प्रदान कैना अभ्यास करटी रहल बटैलै । उहाँ यैसिन कार्यक्रमसे बालबालिकाके समग्र विकासमे सकारात्मक प्रभाव पर्ना विश्वास लेहल बटैलै ।
उहाँ कहलै, समाजमे अक्षर चिन्हा मने अपन व्यवहारहे नैचिन्ह व्यक्ति बटै । और जनहनहे दोष ओ आक्षेप केल्ह लगैलेसे समाजमे नकारात्मक प्रभाव परटी जाई ।
स्वस्थ जीवन बालबालिकाके उज्ज्वल भविष्यके आधार, आहार, विचार ओ व्यवहारके अन्तरसम्बन्ध योग, ध्यान ओ प्राकृतिक जीवनशैलीके अभ्यास साथै राष्ट्रिय लोक तथा दोहोरी गायक बद्री पंगेनीके विशेष प्रस्तुती रहल रहे ।
पाठशालाके शिक्षक अभिभावक संघके अध्यक्ष ईश्वर गिरीके अध्यक्षतामे हुइल कार्यक्रममे शिक्षा संयोजक तेज विक्रम शाही कार्यक्रमके उदेश्यबारे जानकारी डेहल रहिट । विद्यालयके योग प्रशिक्षक निर्मला सिंह योगबारे जानकारी करैटी मानव जीवनहे स्वास्थ्य रना योग जरुरी रहल बटैली । विद्यालयमे विहान ५ बजेसे साढे ६ बजेसम प्रत्यृेक दिन योग संचालन हुइटी आइल बटैली । कार्यक्रममे विद्यालयके प्रिन्सिपल प्रेमनिधि ओझा, निर्देशक कटकबहादुर सिंह, विद्यालयके शिक्षक, अभिभावक, विद्यार्थी तथा शिक्षाविद्हुकनके उल्लेखनीय उपस्थिति रहे ।
