धनगढीके बजेट दुई अर्ब ५६ करोड
पहुरा समाचारदाता
धनगढी, ७ असार । धनगढी उपमहानगरपालिकासे आगामी आर्थिक बरस २०८२/०८३ के लाग दुई अर्ब ५६ करोड ४ लाख बराबरके बजेट लन्ले बा ।
शनिच्चरके बैठल १३औं नगरसभामे नगर उपप्रमुख कन्दकला राना अगामी आर्थिक बरसके लाग दुई अर्ब ५६ करोड चार लाख बराबरके बजेट प्रस्तुत करल रही ।
चालुतर्फ एक अर्ब ३८ करोड २५ लाख ५१ हजार ओ पुँजीगततर्फ एक अर्ब १८ करोड २९ लाख बजेट छुट्याइल बा । बजेट स्रोत विवरण अनुसार उपमहानगरके आन्तरिक आय ५४ करोड ७९ लाख ६७ हजार १११ रुपैयाँ रहल बा ।
राज्यसे प्राप्त बाँडफाँड ५७ करोड ६० लाख ६२ हजार १४३ रुपैयाँ बा कलेसे संघीय सरकारसे ९९ करोड ९ लाख रुपैयाँ ओ प्रदेश सरकारसे ११ करोड २२ लाख ४१ हजार रुपैयाँ प्राप्त हुइना उल्लेख करल बा । साथे मौज्दात रकम ३३ करोड ३२ लाख ९५ हजार ७४६ रुपैयाँ रहल बा ।
चालु आर्थिक बरस २०८१/८२ मे उपमहानगरपालिकासे २ अर्ब १८ करोड ४२ लाख ३२ हजार २२० रुपैयाँके बजेट कार्यान्वयन करल रहे । जौनअन्तर्गत जेठ मसान्तसम १ अर्ब ८१ करोड ५ लाख ८४ हजार ७२२ रुपैयाँ खर्च हुइल उपमहानगर जनैले बावै । धनगढी उपमहानगरपालिकासे चालु आर्थिक बरसके तुलनामे ३७ करोड ६२ लाख ३३ हजार ७८० से ढेर बजेट लानल हो ।
यी आघेक बरसके तुलनामे १७ दशमलव २२ प्रतिशतसे ढेर हो । उपमहानगरपालिकासे लानल बजेट शनिच्चरके नगरसभासे सर्वसम्मत रूपसे पारित करल बा ।
उहीसे आघे नगरसभामे नगर प्रमुख गोपाल हमाल अगामी आर्थिक बरसके नीति तथा कार्यक्रम प्रस्तुत करल रहिट । स्वास्थ समस्याके कारण हमाल प्रस्तुत करे नैसेक्ना हुइल पाछे उपप्रमुख राना सहयोग करल रही ।
अधिवेशनमे आर्थिक वर्ष २०८२/०८३ मे संचालन हुइना गौरवके योजनामे विशेष वडा स्वास्थ्य क्लिनिकहे उपमहानगरपालिकाके गौरवके कार्यक्रमके रुपमे संचालन हुइना जनागिल बा । सामुदायिक विद्यालय शैक्षिक गुणस्तरण सुधार कार्यक्रमहे गौरवके योजनाके रुपमे संचालन कैना बा । हाम्रो धनगढी, सफा धनगढी अभियान, हरियाली प्रवद्र्धन कार्यक्रम, उज्यालो धनगढी कार्यक्रम, सीप तथा रोजगार मेला कार्यक्रमहे निरन्तरता डेना कहल बा ।
महिला उद्यम बजार, सन्धयाकालिन बजार, जहाँ खाली त्यहाँ हरियाली कार्यक्रम संचालन कैना, हर घडी नगर प्रहरी अभियान मार्फथ उपमहानगरीय प्रहरी बलहे साधन स्रोतसहित सुसञ्जित करके प्राथमिकताके साथ परिचालन कैना कहल बा ।
नीति तथा कार्यक्रममे आर्थिक विकास नीति, कृषि विकास कार्यनीति, पशुपक्षि विकास कार्यनिति, सहकारी विकास तथा गरिबी न्युनिकरण कार्यनीति, उद्योग कार्यनीति, पर्यटन तथा संस्कृति प्रवद्र्धन कार्यनीति, रोजगार प्रवद्र्धन कार्यनीति लेहल बा ।
ओस्टेक सामाजिक विकास नीति, शिक्षा यूवा तथा खेलकुद विकास कार्यनीति, स्वास्थ्य सेवा कार्यनीति, महिला बालबालिका तथा अपाङगता क्षेत्रसम्बन्धी कार्यनीति, सामाजिक/सामुदायिक विकास कार्यनीति, पूर्वाधार विकास नीति, शहरी पूर्वाधार विकास तथा वातारण व्यवस्था कार्यनीति, भवन आवास वस्ती विकास तथा शहरी विकास कार्यनीति, भूमि सम्बन्धी कार्यनीति, पर्यटन पूर्वाधान विकास कार्यनीति, सञ्चार तथा सूचना प्रविधि कार्यनीति, विद्युत तथा वैकल्पिक उर्जा कार्यनीति, वन वातावरण तथा विपद व्यवस्थापन नीति, वन वातावरण तथा विपद व्यवस्थापन कार्यनीति, वातावरण खानेपानी तथा सरसफाई व्यवस्थापन कार्यनीति रहल बा ।
संस्थागत सुशासन तथा जनशक्ति विकास नीति, संस्थागत क्षमता अभिवृद्धि तथा मानव संशाधन विकास कार्यनीति, कानून न्याय तथा न्यायिक निरुपण सम्बन्धी कार्यनीति, आन्तरिक लेखा परीषण आन्तरिक खरिद व्यवस्थान कार्यनीति, उपभोक्तहित सम्बन्धी कार्यनीति ओ राजश्व परिचालन कार्यनीति प्रस्तुत कैगिल बा ।
