गौरीगंगा–१० बालमैत्री वडा घोषणा
पहुरा समाचारदाता
धनगढी, ९ असार । कैलालीके गौरीगंगा नगरपालिका वडा नम्बर १० हे जिल्लाके पहिल बालमैत्री वडा घोषणा करल बा । सुदुरपश्चिमके मुख्यमन्त्री कमल बहादुर शाह उ वडाहे बालमैत्री वडा घोषणा करल हुइट ।
बालमैत्री स्थानीय शासनके आधारभूत सूचक पूरा करल ओरसे वडाहे बालमैत्री वडा घोषणा करल वडाध्यक्ष नरसिंह सार्की जानकारी डेलै । बालमैत्री वडा घोषणा करेक लाग कुछ मापदण्ड पूरा करेपर्ना रहठ ।
बालबालिका मैत्री वडा हुइना बालबालिकाके क्षेत्रमे बजेट विनियोजन, शतप्रतिशत बालबालिका विद्यालय भर्ना, सक्कु विद्यालयमे छात्रछात्रामैत्री शौचालय, सक्कु बालबालिकाहे पूर्ण खोप, सक्कु घरमे शौचालय, सक्कु बालबालिकाके जन्मदर्तालगायतके न्यूनतम मापदण्ड पूरा करेपर्ना प्रावधान रहल जिल्ला समन्वय समिति कैलालीके सुचना अधिकारी विमल प्रकाश जोशी बटैलै ।
गौरीगंगा नगर प्रमुख देवीदत्त कडेल “कैलाली जिल्लामे १० नम्बर वडा पहिल बालमैत्री वडाके रुपमे घोषणा हुइना गर्वके विषय हो” घोषणामे केल्ह सीमित नैहुके आम बालबालिकाके पक्षमे हु्इना करके दिगोपनाके निरन्तरता रहेपर्ना बटैलै । वडासे बालमैत्री स्थानीय शासन कार्यन्वयन निर्देशिका–२०७८ ओ बाल मैत्री स्थानीय शासन घोषणा कार्यबिधि –२०७९ अनुसारके ५१ ठो सुचक पुरा करल बा । वडा बाल बचाउके क्षेत्रमे १४ सुचक, संरक्षणके क्षेत्रमे १० ठो सुचक, बाल बिकासमे ६ ठो सुचक, सहभागीमे ६ ओ संस्थागतमे जम्मा १५ ठो करके ५१ ठो सुचक पूरा करल बा ।
बालमैत्री स्थानीय शासन राष्ट्रिय रणनीतिअनुसार स्थानीय तहहे बालमैत्री कराइक लाग ५१ ठो सूचक पूरा करेपर्ना प्रावधान अनुरुपके कार्य करल वडा अध्यक्ष नरसिंह सार्की जानकारी डेलै ।
वल्र्ड भिजन ईन्टरनेशनल नेपाल ओ बाल कल्याण संघ टीकापुरके आर्थिक ओ प्राविधिक सहयोग तथा गौरीगङगा नगर पालिका ओ वडा नं –१० के समन्वयमे बालमैत्री स्थानीय शासन युक्त वडा घोषणा करल रहे ।
