एभरेष्ट एकेडेमीसे धान रोपाइँ सप्ताह सुरु
पहुरा समाचारदाता
धनगढी, ९ असार । कैलालीके अत्तरियामे रहल एभरेष्ट एकेडेमीसे धान रोपाइँ सप्ताह सुरु करले बा ।
राष्ट्रिय धान दिवस (असार १५) हे लक्षित करके स्कुलसे ‘पढाइसँगे खेती, लक्ष्य लिऔं समृद्धि र प्रगति’ कना नाराके साथ धान रोपाइँ सप्ताह सुरु करल हो । एकेडेमीसे असार ८ गतेसे १५ गतेसम विविध शैक्षिक तथा व्यवहारिक कृषि गतिविधि सञ्चालन कैना जनाइल बा ।
कार्यक्रमके पहिल दिन, विद्यालयके कक्षा ९ के विद्यार्थीहुक्रे गोदावरी नगरपालिका–५, गेटास्थित कृषक चामु चौधरीके करिब ९ कट्ठा खेतुवामे सामूहिक रोपाइँमे सहभागी हुके रोपाइँ सप्ताहके सुरुवात करले बटै । कृषक चौधरीसे विद्यार्थीहुकनके सक्रिय सहयोगसे एक्के दिनमे सारा खेत रोपाइँ सम्पन्न हुइलमे खुशी व्यक्त करलै ।
उहाँ यी मेरिक शैक्षिक सहभागितासे कृषिप्रति विद्यार्थीहुकनके झुकाव बह्रना विश्वास व्यक्त करलै । विद्यालयके प्रिन्सिपल स्माइल चौधरी कार्यक्रमके बारेमे जानकारी डेटी कहलै, ‘शिक्षा केवल किताबी ज्ञानमे सीमित रहे नैपरल । विद्यार्थीनहे माटी, उत्पादन ओ समुदायसँग जोरके सिखैना हमार लक्ष्य हो ।’
सप्ताहव्यापी रोपाइँ कार्यक्रमअन्तर्गत विद्यालयसे सामूहिक रोपाइँ, हर जोटे सिखैना, हिला खेल्न कार्यक्रम (शिक्षण खेती), साथे ‘धान हमार धन’ विषयमे चित्रकला तथा निबन्ध प्रतियोगिता सञ्चालन कैना तयारी करल बा । ओस्टे, धानके महत्वबारे भिडियो भाषण तथा कविता प्रतियोगिता, कृषिमे प्रयोग हुइना औजार तथा प्रविधिबारे अवलोकन ओ धानके जीवन चक्रबारे स्टिममे आधारित सिकाइ कार्यक्रमफे सञ्चालन कैना विद्यालय जनैले बा ।
कार्यक्रमके अन्तिम दिन किसान सम्मान कार्यक्रम आयोजना कैना विद्यालयके प्रिन्सिपल स्माइल चौधरी बटैलै । उहाँ उ सम्मान कार्यक्रममे स्थानीय कृषकहुकनके योगदानके कदर कैना बटैलै । विद्यालयके यैसिन अभ्याससे विद्यार्थीमे कृषि चेतना, सामाजिक उत्तरदायित्व ओ व्यवहारिक शिक्षासँगके सम्बन्ध बल्गर बनैना अपेक्षा कैना उहाँ बटैलै ।
