स्वदेशमे रोजगार नैहो कना मनस्थिति त्यागीः राज्यमन्त्री खडका
पहुरा समाचारदाता
धनगढी, १० असार । सुदूरपश्चिम प्रदेश सामाजिक विकास राज्यमन्त्री सरस्वती खडका स्वदेशमे रोजगारीके प्रशस्त सम्भावाना रहल बटैले बटी ।
गुड नेवरके सहयोगमे सेवक नेपालसे सञ्चालित एकिकृत सामुदायिक विकास परियोजना अन्र्तगत यूवाहुकनहे क्यारियर काउन्सिलिङ तथा मार्ग निर्देशन सम्बन्धी तीन दिने प्रदेश स्तरीय परामर्श तालिम समापन कार्यक्रममे सम्बोधन करटी उहाँ उ बत्वाइल रहिट ।
समापन कार्यक्रमके प्रमुख अतिथि रहल सुदूरपश्चिम प्रदेश सामाजिक विकास राज्यमन्त्री खडक नेपालीहुकनके मनस्थितिमे पढके नेपालमे नैमिलठ कना जागिर नैमिलठ कना बैठल बटैली ।
नेपालीके मनस्थिति ढेर विग्रल बा, राज्यमन्त्री खडका कहली, हम्रे पढके यहाँ जागिर टे पैबे नैकरबी ओकर लाग विदेश जैही करी । कक्षा १२ पढके कलेज पढे नैचाहठी । कलेज पढनासे जापनिज, कोरियन भाषा सिखे परी कना बा । हमार संगके संघरीया भैया कमैना हुसेक्लै, पैसा घरमे पठैना हुसेक्लै, हम्रे कहिया कैना हो । आजकाल्ह सबसे पह्रना विद्यार्थीहे चिन्ता बा ।
उहाँ कहली, ढेर भैया बहिनीयाहुक्रे कुलटमे फँस्टी रहल बटै । दैनिक घटना विवरण हेरेबेर लागुऔषधमे फँसल, आत्महत्या करटी रहल, यूवाहुक्रे मदिरा सेवन, जुवा खेल्टी रहल अवस्था बा । १२ कक्षापाछे विदेश पलायन हुइल बटै ।’
सररकारसे स्वरोगारीके लाग अवसर जुराडेना केल्ह हो मने यकर लाग यूवापिढी अग्रसर हु्इना जरुरी रहल उहाँ बटैली ।
कुछ करेक लाग मनोबल उच्च रख्ना जरुरी रहल बा, अपन जीवनहे सेटल कैसिक रख्न, आर्थिकसँग कैसिक जोरना उहोर ओर ध्यान जैना जरुरी रहल राज्यमन्त्री खडका बटैली । कतिपय विद्यार्थी विहानके समयमे चिया, टिना बेचके आर्थिकसंँग जोरटी दिनके क्याम्पस जैना करल हम्रे डेखल बटी उहाँ कहली । अब्बेक भैयाबहिनीहुक्रे अपनहे सुधार करके लग्न जरुरी रहल बा ।
सामाजिक विकास मन्त्रालय आर्थिक अवस्था कम्जोर रहल बालबालिकाहे सहयोग करटी आइलफे बटैलै ।
नेपालमे लोकसेवा खुल्टी रहठ । नीजि क्षेत्रसे आवश्यकता मग्टी रहठ । मनोवलहे बल्गर बनाके आघे बह्रेपर्ना जरुरी रहल कहली । राज्यमन्त्री अपन अनुभव सुनैटी एसईई पास हुइलपाछे ढेर ठाउँमे जागिरके लाग निवेदन डेह मने अब्बे उहे क्षेत्रके अनुगमन कैना क्षेत्रमे पुगल बटैली ।
उहाँ यूवाहुकनहे अपन क्यारियर बनैना आपन गोरमे नैठरहयाइटसम दायाँबाँया नैसोच्न आग्रह करली । क्यारियर बनैना महत्वपूर्ण बाट हो, उहाँ कहली, भोज हुइना आघे ढेर चिज करेसेक्जाइठ मने भोजपाछे कार्यबोझ बह्रके ओटर करे नैसेक्जाइठ । अब्बेक बालबालिकाहुकनके हात हातमे मोवाइल बा मने काम लग्ना चिज हेरडेना उहाँ आग्रह करली । अपन गाउँके विद्यालयमे मजा शिक्षक नैहुइट कलेसे मजा शिक्षक बनके अइना, नेता मजा नैहइठ कलेसे असल नेता हुके अइना ओ विकास कैना मने स्वदेशमे रोजगार नैहो कना मनस्थिति मनसे हटैना राज्यमन्त्री खडका आग्रह करली ।
सेवक नेपालके सहयोगमे अध्ययनन विद्यार्थीहुक्रे कार्यक्रमसे ड्रप आउट हुई लागल ओरसे ओइनके क्यारियर काउन्सिलिङ तथा मार्ग निर्देशन सम्बन्धी तालिम प्रदान करल सेवक नेपालके अध्यक्ष पवन भण्डारी बटैली । सेवक नेपालसे कैलालीमे शिक्षा तथा सामाजिक क्षेत्रमे कार्य करटी आइल बटैली ।
तालिममे कैलाली, डोटी, बाजुरा ओ दार्चुला जिल्लाके ३० जानेक सहभागि यूवाहुकनहे निजामति, बैकिङ क्षेत्र ओ उद्यमशिलता सम्बन्धी प्रशिक्षण कराइल उहाँ बटैली । जेम्ने निजामति सम्बन्धी प्रदेश निर्वाचन कार्यालयके प्रमुख प्रेमराज भट्ट, बैकिङ सम्बन्धी हिमालय बैंकके प्रदेश प्रमुख सरोज रेग्मी ओ उद्यमशिलता सम्बन्धी रामनानी चौधरी प्रशिक्षण डेहल रहिट ।
कार्यक्रममे गैरसरकारी संस्था महासंघ सुदूरपश्चिम प्रदेश अध्यक्ष देवी खनाल अब्बे तीनु तहके सरकार अन्र्तगतके कार्यालयके वेवसाइडसे ढेर सूचना तथा जानकारी पाई सेक्ना ओरसे यूवाहुकनहे रुचि राखडेना आग्रह करलै । तालिममे निभा शाक्य सहजीकरण करल रहिट । कार्यक्रमके संचालन दिनेश ओझा करल रहिट ।
