पोषणमैत्री स्थानीय शासन कार्यान्वयन सम्बन्धी अभिमुखीकरण
पहुरा समाचारदाता
धनगढी, ११ असार । बहुक्षेत्रीय पोषण योजना तथा पोषणमैत्री स्थानीय शासन कार्यान्वयन सम्बन्धी सरोकारवालाहुकनहे पालिकास्तरीय अभिमुखीकरण कार्यक्रम कैगिल बा ।
कैलाली गाउँपालिकाके आयोजना तथा सामुदायिक विकास केन्द्र डोटी, यूनिसेफके सहयोगमे पोषणमैत्री स्थानीय शासनके लाग छलफल कैगिल हो । कैलारी गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे बहुक्षेत्रीय पोषण योजना तथा पोषणमैत्री स्थानीय शासन सम्बन्धी युनिसेफके पोषण अधिकृत सज्जन योगेश जानकारी डेहल रहिट । उहाँ मुलुकभरके पोषणके अवस्था, स्वास्थ्य क्षेत्रके तथ्यांङकनके अवस्थाबारे जानकारी डेहल रहिट ।
कैलारी गाउँपालिका स्वास्थ्य शाखा प्रमुखफे नरेश चौधरी कैलारी गाउँपालिकाके विषयगत शाखासे पोषणके लाग पुरा करेपर्ना इन्डिकेटरबारे जानकारी डेहल रहिट । सिङगो कैलारी गाउँपालिकाहे पोषणमैत्री स्थानीय शासन घोषणा करेनैसेक्लेसेफे जौन वडामे पोषणके इन्डिकेटर पुगल उ ठाउँसे वडास्तरसे हुइटी पालिकाहे पोषणमैत्री घोषणा करेसेक्ना ओ यकर लाग यूनिसेफ नेपालसे सहयोग मग्ना उहाँ बटैलै ।
कुपोषणके अन्त्य, मानवपुँजी निर्माण ओ समग्र आर्थिक सामाजिक विकासमे हुइपर्ना कहल बा । यकर लक्ष्यमे गुणस्तरीय पोषण सेवाके उपलब्धता ओ पहुँचके सुनिश्तिता करटी मानव जीवन चक्रमे पोषणाके अवस्था सुधार कैना रहल बा । बहुक्षेत्रीय पोषण योजना टिसराके प्रमुख स्पान्तरणके लाग स्वास्थ्य प्रणाली, खाद्य प्रणाली, शिक्षा प्रणाली, खानेपानी सरसफाई तथा स्वच्छता प्रणाली, सामाजिक सुरक्षा प्रणाली हुइपर्ना बटैलै ।
स्वास्थ्य कार्यालय कैलालीके परिवार नियोजन अधिकृत ओलट नारायण चापागाई कैलारी गाउँपालिका स्वास्थ्यके क्षेत्रमे मजा काम करटी रहल ओरसे यी पालिकाके विषयगत शाखा, स्वास्थ्यकर्मीलगायत संघसंस्थासे सहयोग करलेसे पोषणमैत्री स्थाननीय शासन घोषण कैना कौनो गाह्रो नैरहल बटैलै ।
कार्यक्रमके अध्यक्ष तथा गाउँपालिका उपाध्यक्ष भगवतीकुुमारी चौधरी पोषणमैत्री स्थानीय शासन घोषणाके लाग पालिकामे रहल सक्कु विषयगत शाखासे सहयोग समन्वय कैना जरुरी रहल बटैलै । अब्बे भौतिक विकासहे केल्ह विकास मन्ना प्रचलन बा । मने सामाजिक विकास जरुरी बा । सामाजिक विकास विना पोषणमैत्री स्थानीय शाखन घोषणा गाह्रो रहल बा । कार्यक्रममे वडा अध्यक्षहुक्रे, कार्यपालिका सदस्य, विषयगत शाखाके प्रमुखहुक्रे, यूनिसेफके लता बज्रचार्य, सिडिसी डोटीके जिल्ला कार्यक्रम संयोजक तिलक चौधरी, कार्यक्रम अधिकृत करुणा चौधरीलगायतके सहभागिता रहे ।
