कैलालीमे करिब २ हजार घरेम पानी पैठल
पहुरा समाचारदाता
धनगढी, १६ असार । अँटवार विहानसे बरसल भारी वर्षाके कारण सुदूरपश्चिम प्रदेशके टमान जिल्लाके जनजीवन अस्तव्यस्त बनल बा ।
प्रदेशके कैलाली, कञ्चनपुर, डडेल्धुरा लगायतके जिल्लामे बरसल भीषण वर्षासे तराईके भूभाग डुबानके उच्च जोखिममे परल हो । जिल्ला प्रशासन कार्यालय कैलालीके अनुसार लगातारके वर्षाके कारण धनगढी उपमहानगरपालिका ओ गोदावरी नगरपालिकाके झन्डै दुई हजार घरेम पानी पैठल बा ।
जिल्ला प्रशासन कार्यालयके प्रशासकीय अधिकृत शिवराज जोशी धनगढी उपमहानगरपालिका–१, २, ३, ४, ५, ७, ८ ओ १० नम्बर वडा ओ गोदावरी नगरपालिका वडा नम्बर १, २ ओ ३ बस्ती वर्षाके कारण प्रभावित हुइल बटैलै ।
अविरल वर्षापाछे घर डुबानमे परके फसल आठ जनहनहे प्रहरी उद्धारफे करले बा । धनगढी उपमहानगरपालिका–७ के बेली गाउँके चार जाने ओ धनगढी–१३ के श्रीलंकाके चार जाने करके आठ जानेक उद्धार करल जिल्ला प्रहरी कार्यालयके प्रवक्ता प्रहरी नायब उपरीक्षक (डीएसपी) राजकुमार सिंह बटैलै ।
बाढके जोखिमहे मध्यनजर करटी जल तथा मौसम विज्ञान विभागसे लडियक किनार आसपासके बासिन्दाहुकनके सोम्मार साँझसम उच्च सतर्कता अपनैना आग्रह करले बा । सम्भावित खतरासे जोगैना प्रशासनसे जोखिमयुक्त क्षेत्रके नागरिकहुकनहे मोबाइलमे एसएमएसमार्फत सचेतफे करैले बा ।
