कृषि उपज संकलन केन्द्र बनलपाछे कृषक उत्साहित
पहुरा समाचारदाता
घोडाघोडी, १६ असार । वडा तहमे आपन उत्पादन करल कृषि उपज सङ्कलनके लाग भवन निर्माण हुइलपाछे कृषक उत्साहित बनल बटै ।
कैलालीके घोडाघोडी नगरपालिका ३ निम्दीमे कृषि उपज संकलन केन्द्रके रुपमे भवन चालु आर्थिक बरसमे निर्माण हुइल हो । पाछेक समय व्यवसायी टिना फलफूल खेती करुइया किसानहे उ संकलन केन्द्रसे सहयोग पुग्ना अपेक्षा लेहल बा । वडा नम्बर ३ के फुलकुमारी चौधरी व्यवसायीक टिनाटावन खेती कैटी आइल ओ आपन उत्पादनहे हाटबजारमे बेच्ना करल बटैली ।
उहाँ कहली, “कबुकाल ढेर हुइल टिनाटावन कहाँ लैजाके रख्ना कना समस्या होए । सङ्कलन केन्द्रमे जम्मा कैके किल नैहुइ । वहाँसे बिक्री वितरणमे फेन सहयोग हुइ परल ।”
स्थानीय रामचन्द्र चौधरी समेत व्यवसायीक टिना खेती करुइया कृषक हुइट । उहाँ उत्पादन करल टिनाटावन हाटबजारमे लैजाके बेच्ठै । उत्पादन हुइल सक्कु अक्के ठाउँमे सङ्कलन कैके बेच्ना वातावरण हुइलपाछे व्यवसायीक खेतीहे बह्रैना बटैलै ।
कृषि ज्ञान केन्द्र कैलालीसे उक्त भवन निर्माणमे सहयोग करल हो । करिब २० लाख रुपियाँ अनुदान सहयोगमे कृषी उपज सङ्कलन केन्द्रके रुपमे भवन निर्माणसँगे गाउँ गाउँसे उत्पादन हुइना टिना सङ्कलनमे सहज हुइना जनाइल बा ।
घोडाघोडी नगरपालिकाके उपप्रमुख गुलिया कुमारी चौधरी कृषि उपज सङ्कलन केन्द्रमे गाउँगाउँसे टिनाटावन संकलन हुइना ओ बजारीकरण हुइना हुइल ओरसे स्थानीय कृषकहे लाभ मिल्ना बटैली । कृषि उपज संकलन केन्द्रहे व्यवस्थित रुपमे सञ्चालन कैना उहाँ आग्रह समेत रहल बा ।
घोडाघोडी नगरपालिकाके कृषी शाखा प्रमुख जनक धामी किसानसे उत्पादन करल उपज संकलनके लाग वडा वडामे गोदाम आवश्यक रहल बटैलै । उहाँ कहलै, “प्रत्येक वडामे संकलन केन्द्रके आवश्यक रहल बा । किसानसे उत्पादन करल वस्तुहे अक्के ठाउँमे जम्मा कैना ओ विक्री वितरणमे सहयोग पुग्ना बा ।”
