रानाथारू भाषाके व्याकरण ओ शब्दकोशबारे बहस
पहुरा समाचारदाता
धनगढी, १७ असार । रानाथारू भाषा संरक्षण तथा प्रवद्र्धनके उद्देश्यसहित कञ्चनपुरके लालझाडी गाउँपालिकामे व्याकरण ओ शब्दकोशबारे विशेष अन्तरक्रियात्मक कार्यक्रम तथा बहस सम्पन्न हुइल बा ।
नेपाल रानाथारू महिला संघ कञ्चनपुरके आयोजनामे तथा लालझाडी गाउँपालिकाके सहकार्यमे सोम्मारके आयोजित कार्यक्रममे स्थानीय जनप्रतिनिधिसे भाषाविद्हुक्रनके सहभागिता रहल रहे ।
कार्यक्रमके अध्यक्षता संघके अध्यक्ष प्रेमवती राना करल रही कलेसे गाउँपालिका अध्यक्ष निर्मल राना बर्का पहुना रहल रहिट । प्रमुख प्रशासकीय अधिकृत राजबहादुर सार्की तथा रानाथारू भाषाके विज्ञ ओ भूमि आयोग कैलालीके सदस्य कमलसिंह रानाके विशेष उपस्थिति रहल रहे ।
गाउँपालिका अध्यक्ष राना भाषा जातीय पहिचानसँग प्रत्यक्ष सम्बन्धित रहल उल्लेख कैटी स्थानीय सरकारसे रानाथारू भाषाके संरक्षण ओ प्रवद्र्धनमे प्राथमिकता डेटी आइल बटैलै । प्रमुख प्रशासकीय अधिकृत सार्की संविधानसे स्थानीय तहहे भाषा संरक्षणके लाग नीति तथा कार्यक्रम बनैना अधिकार डेहल स्मरण करैटी समुदायके चासो ओ आग्रहमे पालिकासे पूर्ण साथ डेना प्रतिबद्धता जनैलै ।
भाषाविद् कमलसिंह राना रानाथारू भाषाके संरचना, व्याकरण निर्माण, मौलिक शब्द संकलन ओ अभिलेखीकरणमे पाछेक समय महत्वपूर्ण कार्य हुइटी रहल उल्लेख कैटी भाषा संरक्षण भावी पुस्ताके लाग अमूल्य सम्पदा हुइना बटैलै ।
संघके अध्यक्ष प्रेमवती राना भाषा दस्तावेजीकरण, महिला सशक्तीकरण ओ सांस्कृतिक पुनर्जागरणमा संघके सक्रियता रहल उल्लेख कैटी भाषा संरक्षणके लाग स्थानीय, प्रदेश ओ संघीय सरकार तथा समुदायबीच समन्वय आवश्यक रहल बटैली ।
कार्यक्रममे सहभागी वडाध्यक्ष, विद्यालय व्यवस्थापन समिति अध्यक्ष, शिक्षक, कर्मचारी, उपभोक्ता समूहके प्रतिनिधि, पत्रकारलगायत रानाथारू भाषाहे विद्यालय शिक्षा, पाठ्यक्रम, रेडियो कार्यक्रम तथा पुस्तक मार्फत प्रवद्र्धन करे पर्नामे जोड डेहल रहिट । वहाँहुक्रे समुदायस्तरमे भाषा प्रशिक्षण, सञ्चार सामग्री उत्पादन तथा राज्यके नीति ओ बजेटमे भाषा संरक्षणहे प्राथमिकतामे रख्ना आग्रह करल रहिट ।
