जोशीपुर पूर्ण खोप सुनिश्चितता घोषणा
पहुरा समाचारदाता
जोशीपुर, १८ असार । कैलालीके जोशीपुर गाउँपालिकाहे पूर्ण खोप सुनिश्चितता एवं दिगोपना घोषणा करल बा ।
यी पालिकाभिटरके १६ से ५९ महिनाके बालकालिकाके सर्वेक्षण करेबेर सक्कु बालबालिकासे १५ महिनाके उमेर भिटर राष्ट्रिय खोप तािलका अनुसार सक्कु खोप प्राप्त कैना प्रकृया पुरा करल बमोजिम जोशीपुर गाउँपालिकासे पूर्ण खोप सुनिश्चितता एवं दिगोपना घोषणा करल स्वास्थ्य शाखा प्रमुख नृपराज डंगौरा बटैलै ।
“स्थानीय स्वामित्व ओ सहभागिताः पूर्ण खोप गाउँपालिका हहमार प्रतिवद्धता” मूल नारा रहल कार्यक्रममे स्वास्थ्य स्वयम् सेविका, स्वास्थ्य ईकाईके स्वास्थ्यकर्मी, प्राथामिक स्वास्थ्य केन्द्रके स्वास्थ्यकर्मी, जनप्रतिनिधि लगायतके उपस्थिति रहे । नेपालके तथ्याङ्क अनुसार १०० जाने मध्य ८० जाने बालबालिका केल्ह पूर्ण खोप पाइल १६ जाने आंशिक रुपमे खोप पाइल ओ ४ जाने खोप नैपैले हुइट ।
आ.व. २०८०÷०८१ मे जोशीपुर गाउँपालिका अन्तरगत करल सर्वेक्षणसे ० से १५ महिना समके ५ सय ७ जाने मध्य ५ सय १ जानेक खोप कार्ड रहल ओ ६ जानेक खोप कार्ड नैरहल भेटल रहे । १६ महिनासे ५९ महिनासमके बालबालिका १ हजार २ सय ८७ जाने मध्य पूर्ण खोप पाइल १ हजार २ सय ६७, आंशिक रुपमे खोप पाइल २० जाने रहल बटै । कलेसे २० जाने मध्य १ जाने कौनोफे खोप नैलगाइल (० डोज) पाइल रहे ।
३ महिना (माघ, फागुन ओ चैत्र) के घरधुरी सर्वेक्षणमे भेटल खोप नैलगाइल आंशिक तथा ० डोजके बालबालिकाहे ‘खोज ओ खोप’ (बैशाख) कना कार्यक्रम अन्तरगत खोप लगाके जोशीपुर गाउँपालिकाके बालबालिकाहुकनहे पूर्ण रुपमे खोप डेके पूर्ण खोप सुनिश्चितता एवं दिगोपना घोषणा करल समेत शाखा प्रमुख चौधरीले बटैलै ।
पूर्ण खोप सुनिश्चितता एवं दिगोपना घोषणाके लाग सहयोग कैना महिला स्वास्थ्य स्वयम् सेविका, वडागत स्वास्थ्य ईकाईके स्वास्थ्यकर्मी तथा प्राथमिक स्वास्थ्य केन्द्रके डाक्टर ओ स्वास्थ्यकर्मीहुकनहे कार्यक्रममे सम्मान पत्रसे सम्मान करल रहे ।
खोप लगैना स्थानमे खोपके तापक्रम सन्तुलित कैना खालके बातावरणके लाग ओ डाई तथा बालबालिकाहुकनके लाग उचित व्यवस्थापन कैना सरकारके ध्यानाकर्षण हुई पर्ना महिला स्वास्थ्य स्वयम् सेविका दुर्गा चौधरीके कहाई रहे ।
जोशीपुर गाउँपालिका अन्तरगतके कमजोर ओ विपन्न २ सय ८५ परिवारके बालबालिकाहुकनके पालिकासे स्वास्थ्य विमा करडेना हो कलेसे स्वास्थ्य क्षेत्रमे भारी सुधार हुइना रमेश पाण्डे बटैलै ।
