चैतन्य पाठशालासे कक्षा ११ मे २५ जनहन पूर्ण छात्रवृति डेना
पहुरा समाचारदाता
धनगढी, १९ असार । कैलालीके धनगढी उपमहानगरपालिका वडा ५ शिवनगरमे रहल चैतन्य पाठशालासे कक्षा ११ मे २५ जनहनहे पूर्ण छात्रवृति डेना जनैले बा ।
यिहे शैक्षिक सत्र–२०८२ मे कक्षा ११ के लाग विज्ञान तथा होटल मेनेजमेन्ट समेतके व्यवस्थापन संकायमे नवीन सोच, नयाँ अभ्यास ओ प्रभावकारी कार्यक्रमके साथ भर्ना प्रक्रिया सुरु करल चैतन्यसे टप २५ जनहनहे पूर्ण छात्रवृति डेना विद्यालयके अध्यक्ष गणेशप्रसाद जोशी बटैलै ।
पूर्ण छात्रवृतिमे सहभागिताके लाग यिहे असार २५ गते हुइना प्रवेश परिक्षामे एसइई पास हुइल विद्यार्थी शैक्षिक प्रमाणपत्रसहित रु १५० टिरके फाराम भरके प्रवेश परिक्षामे सहभागी हुई सेक्ना अध्यक्ष जोशी बटैलै ।
उहाँ कहलै, फाराम भरल विद्यार्थी प्रवेश परिक्षामे सहभागी हुईही, प्रवेश परिक्षामे टप २५ भिटर परलेसे कक्षा ११ मे निशुल्क पह्रे पैही । कलेसे दुसर बरस कक्षा १२ मेफे निशुल्क पह्रे पैही । काठमाडौंके विद्यालयमे डेना गुणस्तरीय शिक्षा धनगढीमे प्रदान करे लागल ओरसे यहाँके विद्यार्थी अपने गाउँठाउँमे बैठके पह्रे सेक्ना उहाँ बटैलै ।
चैतन्य पाठशाला एक उत्तरदायी, सशक्त ओ प्रविधिमैत्री शैक्षिक संस्था हो, जिहीसे आधुनिक विश्व समाज अनुकूल गुणस्तरीय शिक्षा प्रदान करटी आइल बा । सुदूरपश्चिमके धनगढीमे रहिके संस्कार युक्त शिक्षाके माध्यमसे समाजके सकारात्मक रुपान्तरणमे योगदान डेना उद्देश्यसे चैतन्य निरन्तर प्रयत्नशील रहल अध्यक्ष जोशी बटैलै ।
