कैलारीमे सुनौलो १००० दिनके विपन्न परिवारके डाईनहे पोषण कार्यक्रम अनुदान
पहुरा समाचारदाता
धनगढी, २० असार । कैलारी गाउँपालिकासे हजार दिनके विपन्न परिवारके डाईनहे पोषण कार्यक्रम अनुदान डेहे लागल बा ।
कैलारी गाउँपालिकाके आयोजनामे शुकके रोज हसुलियामे हुइल सुनौलो १००० दिनके विपन्न परिवारके डाई ओ हुकान गोसिया घरमुलीहुकनके पोषण कार्यक्रम तथा पोषण अभिमुखीकरण कार्यक्रममे स्वास्थ्य शाखा प्रमुख नरेशकुमार चौधरी पोषण अनुदान डेहे लागल जनैलै ।
कैलारीमे कुपोषणके माध्यम तथा सामान्य केस डेखा परल बा । कडा खाले कुपोषणहे मध्य नजर करटी २५ जाने प्रतिडाईहुकनहे रु. २५ हजारके दरसे पोषण अनुदान डेहे लागल उहाँ बटैलै ।
उहाँ कहलै, सुनौलो हजार दिनके बच्चामे कडा खाले कुपोषण डेखा परल विपन्न परिवारहे वडा कार्यालयके सिफारिसमे पोषण अनुदान डेहे लागल बा । उ पैसा जथाभावी खर्च नैकरके तरकारी खेती वा अन्य उत्पादनमुलक व्यवसायमे लगानी करके आइल आम्दानीसे लर्कनहे पोषणयुक्त खानामे खर्च करेपर्ना बा । विपन्न परिवारके उ डाईनहे सोझे नगद नैडेके ओइनके बैंक खातामे विउ पुँजीके रुपमे २५ हजार रुप्या जमा कैना ओ उहाँहुक्रे उ पैसा उत्पादनमुलक कार्यमे केल्ह लगानी करे पैना बा ।
गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ गाउँपालिकासे पोषणमैत्री पालिका बनाइक लाग टमान मेरिक कार्यक्रम संचालन करल बटैली । उहाँ कहली, ‘लर्कनके कुपोषणसे बचाइक लाग डाईक स्वास्थ्य मजा हुइना जरुरी बा । जेकर लाग छोटिहीसे चेकजाँच कैना जरुरी बा । बच्चा गर्भमे आइलठेनसे नियमित चेकजाँच ओ डाईनहे पौष्टिक तत्व आवश्यक परठ । जब बच्चा जलम लेठै ओठेहेसे नियमित जाँच तौल ओ पोषणयूक्त खाना खैना झन जरुरी रहठ ।
गाउँपालिका उपाध्यक्ष भगवती अपने उपाध्यक्ष समावेशी कार्यक्रमसेफे भर्खर जलमल लरकोरया डाईनके पोषण तथा हाइजेनिक किट सामाग्रीसहितके उपहार वितरण करटी आइल जनैली । यी साल कैलारी गाउँपालिकास्थित टमान वडाके ३ सय ९१ जाने सुत्केरी महिलाहुकनहे पोषण सामाग्री डेगिल उहाँ जनैली ।
उपाध्यक्ष समावेसी पोषण कार्यक्रम अन्र्तगत कैलारी गाउँपालिकाके वडा नम्बर २, ३, ५, ६, ८ ओ ९ वडामे एक बरस भिटरके सुत्केरी महिलाहुकनहे पोषण सामाग्री वितरण गाउँपालिका उपाध्यक्ष बटैली ।
अभिमुखीकरण कार्यक्रममे कैलारी गाउँपालिका स्वास्थ्य शाखा प्रमुख नरेशकुमार चौधरी, आइडिइके दामोदर भट्ट, केयर नेपालके अशोक रावल, याक नेपालके लैङिक समानता सामाजिक समावेशीकरण अधिकृत सरिता चौधरीलगायत सहजीकरण करल रहिट ।
ओस्टेक करके कैलारी गाउँपालिकासे यिहीसे आघेसे केयर नेपाल, आइडिइ नेपाल, म्याप इन्टरनेशनलके आर्थिक सहयोग ओ याक नेपालसे पोषण परियोजना अन्र्तगत स्वास्थ्य आमा समुहके सदस्यहुक्रे पोषण सुधारके लाग पोषण बगैचाफे सुरुवाट कैगिल बा ।
याक नेपालके लैङिक समानता सामाजिक समावेशीकरण अधिकृत सरिता चौधरी पोषण परियोजना कैलारी गाउँपालिका वडा नम्बर ४ ओ ७ के २५ ठो आमा समुह पोषण सुधारके लाग पोषण बगैचा सुरुवाट करल बटैली ।
हजार दिनके लरकोरया डाई ओ बच्चाके पोषण सुधारके लाग पोषणके गतिविधि करजैटी बा, उहाँ कहली, ‘सीमान्तकृत समुदायके लाग विउ पुँजीके रुपमे १० हजार रुप्या सहितके किसान कार्ड उपलब्ध करागैल बा । जिहीहे उ समुहमे रहल लरकोरया डाई सागपात, हरियार टिना टावन उत्पादनके लाग विया किन्ना, पोषण बगैचा निर्माण कैना ओ टिना उत्पादन अन्र्तगत कृषि कार्यमे प्रयोग हुइना समान किन्ठै ।
याक नेपालसे आमा समु्हमे आवद्ध रहल ५ सय जनहनहे किसान कार्ड उपलब्ध करैले बा, जौन कार्डमे टिनाके विया, हजारी, पानी डरना पाइप, जाली, उत्पादन पोषण बगैचाके लाग सपोट करल उहाँ बटैली ।
