मातृ भाषाके प्रयोगसे शिक्षण सिकाई सहजः गाउँपालिका अध्यक्ष गणेश चौधरी
पहुरा समाचारदाता
धनगढी, २० असार । कैलाली जिल्लाके जानकी गाउँपालिका अध्यक्ष गणेश चौधरी मातृ भाषाके प्रयोगसे बालबालिकाके शिक्षण सिकाई सहज, प्रभावकारी ओ दिगो हुइना बटैले बटै ।
गाउँपालिकामे आधारभुत तह (कक्षा १–२) के स्थानीय विषय “हमार जानकी“ ओ (कक्षा१–५) के “हाम्रो जानकी“ के पाठ्यपुस्तक प्रबोधिकरण कार्यक्रममे गाउँपालिका अध्यक्ष चौधरी अपन स्थानीय भाषामे बालबालिकाहुक्रे पह्रे पाके मजासे सिकाई कैना ओ बुझ्नामे सरलता हुइना बटैलै ।
विद्यार्थीहुकनहे मौलिक भाषाके सिकाइके विकास तथा अपन पहिचानसंगे सीप ओ व्यवहारिक शिक्षा प्रदानके लाग शिक्षण सिकाईहे सहज एवम् प्रभावकारी बनैना प्रबोधिकरण कार्यक्रम करल बा ।
जानकी गाउँपालिका शिक्षा युवा तथा खेलकुद विकास शाखाके आयोजनामे हुइल कार्यक्रममे सामुदायिक ओ संस्थागत विद्यालयके सहभागिता रहे । कलेसे सहजीकरण टीकापुर बहुमुखी क्याम्पसके सह– प्रध्यापक नाथुराम चौधरी, शिक्षक टंक देवकोटा, सोम प्रसाद कठरिया, खगेन्द्र उपाध्याय करल रहिट ।
कार्यक्रममे उपाध्यक्ष लालमति कठरिया, शिक्षा शाखा प्रमुख धर्मानन्द कपाडी, शंकर न्यौपाने लगायतके उपस्थिति रहे । गाउँपालिकामे स्थानीय विषय २०८० से पाठयक्रमके आधारमे पढाई सुरु हुइल बा ।
