लागूऔषध नियन्त्रके लाग एकजुट हुइ
पहुरा समाचारदाता
धनगढी, २० असार । सुदूरपश्चिम प्रदेशके सामाजिक विकास राज्यमन्त्री सरस्वती खड्का लागूऔषध नियन्त्रके लाग सरोकारवाला सक्कु जाने एकजुट होके लागे परना बटैले बटैं ।
मेन कैलालीके आयोजना तथा सामाजिक विकास मन्त्रालय सुदूरपश्चिम सरकारके सहकार्यमे शुकके रोज धनगढीमे हुइल लागूऔषध नियन्त्रणसम्बन्धी अन्तरक्रिया तथा सचेतना कार्यक्रममे राज्यमन्त्री खड्का विद्यालयस्तरमे अइसिन कार्यक्रम सञ्चालन करेलेसे और प्रभावकारी हुइना बटैले रहैं । उहाँ लागूऔषध नियन्त्रणके लाग समाजमे चेतना फैलैना मन्त्रालयके ओर निरन्तर सहयोग रहना प्रतिबद्धता फेन जनैले रहैं ।
कार्यक्रममे जिल्ला प्रहरी कार्यालयके प्रहरी निरिक्षक दीपकबहादुर धामी लागूऔषधके असर, लागूऔषध दुव्र्यनिस्मे डेखैना शारीरिक ओ मासिक अवस्था, दुव्र्यसनमे लग्ना कारण, दुव्र्यसनसे बच्न उपाय, दुव्र्यसनसे छुटैना उपाय, प्रहरीके प्रयासलगायतके बारेमे जानकारी करैले रहैं ।
मनेके संयोजक चेतराज ओझाके अध्यक्षतामे हुइल कार्यक्रममे धनगढी उपमहानगरपालिका वडा नम्बर २ के वडाध्यक्ष धर्म ओझा, वडा सदस्य केशव पन्त, नेपाल पत्रकार महासंघ सुदूरपश्चिम प्रदेशके अध्यक्ष भरत शाह, नेपाल पत्रकार महासंघ कैलालीके पुर्व अध्यक्ष जगत साउँद, शारदा माविके शिक्षक गणेश मिश्रलगायत मन्तव्य व्यक्त करले रहैं । कार्यक्रममे टमान सामाजिक संस्था, सुरक्षाकर्मी, विद्यार्थी तथा स्थानीय बासिन्दाहुकनके सहभागिता रहे ।
