हिलवल्र्ड स्कूलसे एसईईमे ३.९६ जिपिए ल्यन्ना ठगुन्नाहे कम्प्युटर उपहार
पहुरा समाचारदाता
धनगढी, २१ असार । कैलालीके धनगढी उपमहानगरपालिका–१ मे रहल हिलवल्र्ड ईगलिस बोर्डिङ स्कुलसे बधाई, सम्मान तथा उत्प्रेरणा कार्यक्रम सम्पन्न करले बा ।
एसईई २०८१ के परीक्षामे धनगढीमे उत्कृष्ट नतिजा आइलपाछे विद्यालय उत्साहित हुइटी विद्यार्थी, अभिभावक ओ शिक्षकहुकनके लाग बधाई, सम्मान तथा उत्प्रेरणा कार्यक्रम राखल हो । विद्यालयसे जम्मा २१ जाने एसईई परीक्षा डेहलमे ३.९६ जिपिए ल्यन्टी स्नेहा ठगुन्ना प्रथम हुइल बटी ।
उहाँ कक्षा नर्सरीसे १० सम हिलवल्र्डमे अध्ययन करल हुइट । ओस्टे ३.६७ जिपिए ल्याके संगिता चन्द दुसरा ओ ३.६४ जिपिए ल्यानके सोनिया उपाध्याय टिसरा हुइल बटी । अन्य बाँकी विद्यार्थी ए ओ बी ग्रेड ल्याके उत्तीर्ण हुइल विद्यालयके प्रिन्सिपल डिआर शर्मा जानकारी डेलै । विद्यालयसे उत्कृष्ट नतिजा ल्यन्नामे अभिभाकहुकनके भूमिकाफे रहल शर्मा बटैलै । उत्कृष्ट हुइल ठगुन्नाहे डेस्कटप कम्प्युटर मायाके चिनो डेहे खादा ओ कदरपत्र डेके सम्मान करल हो ।
ठगुन्नासे कार्यक्रममे अपन धारण रख्टी अपन उत्कृष्ट नतिजा अइनामे शिक्षक ओ अभिभाकके उत्प्रेरणा रहल उल्लेख करलै । ओस्टे दुसरा ओ टिसराहे साईकल मायाके चिनो डेके खादा ओ कदरपत्र डेके विद्यालयके व्यवस्थापन समितिके अध्यक्ष भोजबहादुर वम लगायतके व्यक्तिहुक्रे सम्मान करल हुइट । अन्य विद्यार्थीहुकनहे खादा ओ कदरपत्र डेके सम्मान करल हो ।
कार्यक्रममे अध्यक्ष वम कैलालीके शिक्षामे हिलवल्र्डके उल्लेखीए भूमिका रहल बटैलै ।
२०८१ सालके एसईईमे उत्कृष्ट नतिजा ल्यन्नामे विद्यालयके केल्ह नैहुके शिक्षक ओ अभिभावकके भूमिका रहल बटैलै । उहाँ विद्यार्थीके भविष्यके लाग विद्यालय परिवार जबफे चिन्तनशिल हुइल बटैटी अभिभाकहुकनहे अपन लर्कनके विशेष ख्याल कैना अनुरोध करलै ।
विद्यालयके शिक्षक खडक विश्वकर्मा स्वागत मन्तव्य राखल कार्यक्रममे शिक्षक उदयप्रताप सिंह, एसईईमे दुसर हुइना संगिता चन्द मन्तव्य व्यक्त करल रहिट । कार्यक्रममे शिक्षक, अभिभावक, विद्यार्थीहुक्रे ओ सञ्चारकर्मीहुकनके सहभागिता रहल रहे ।
