मानसिक रोगीके संख्या बह्रटी
पहुरा समाचारदाता
धनगढी, २२ असार । वरिष्ठ मानसिक रोग विशेषज्ञ डा. रामप्रसाद लामिछाने मानसिक रोगीके संख्यामे वृद्धि हुइटी गैल बटैले बटै ।
सामाजिक विकास मन्त्रालयके सहयोगमे नेपाल पत्रकार महासंघ कैलाली शाखाके आयोजनामे मानसिक रोग सम्बन्धी सचेतनामुलक कार्यक्रममे डा.लामिछाने मानसिक रोगीके संख्यामे वृद्धि हुइटी गैल बटैले रहिट ।
विश्व स्वास्थ्य संगठनके तथ्यांक अनुसार प्रति चार जाने मन्से एक जनहनमे मानसिक रोग हुइना करल बटैलै । यी रोग बालकसे बृद्धसम सक्कुहुनके हुइना उहाँ बटैलै ।
उहाँ कहलै, लर्कनहे मानसिक रोगके समस्या बह्रलपाछे चिल्लैना, वेहोस हुइना ओ वयस्कामे मानसिक रोग ढेर हुइलेसे डिप्रेसनमे जैना करल बटै ।
मानसिक समस्या कम कैना तनाव व्यवस्थापन, खानपानमे सुधार, जीवनशैलीमे सुधार आवश्यक, पुरा निन्द सुतेपर्ना सुझाव डेलै ।
वरिष्ठ मानसिक रोग विशेषज्ञ डा. लामिछाने मानसिक रोगके समस्या, लक्षण तथा उपचार विधिके बारेमे प्रस्तुतीकरण करटी मानसिक रोगके कारण रक्सी, ड्रग्सफे खैना करल बटैटी यिहीसे झन मानसिक समस्या ल्यन्ना बटैलै ।
नेपाल पत्रकार महासंघ सुदूरपश्चिम प्रदेश अध्यक्ष भरत शाह मानसिक रोग व्यवस्थापन करेक लाग तनाव व्यवस्था, कामके बोझ घटाईपर्ना, नियमित व्यायम करेपर्ना बटैलै ।
नेपाल पत्रकार महासंघ कैलाली शाखाके अध्यक्ष श्रवण देउवाके अध्यक्षतामे हुइल कार्यक्रमके संचालन सचिव तेजराज भट्ट, स्वागत मन्तव्य उपाध्यक्ष विराज रोस्यारा ओ धन्यवाद ज्ञापन उपाध्यक्ष भावाना जोशी करल रहिट । कार्यक्रममे टमान सञ्चारमाध्यममे आवद्ध सञ्चारकर्मीहुकनके सहभागिता रहल रहे ।
