अत्तरियामे वृद्धाश्रम सञ्चालनमे
पहुरा समाचारदाता
धनगढी, २२ असार । कैलालीके अत्तरियामे वृद्धाश्रम सञ्चालनमे आइल बा । धनगढीमे रहल दृष्टि फाउन्डेशनसे अत्तरियामे वृद्धाश्रम सञ्चालनमे ल्यानल हो ।
अँटवारके रोज एक औपचारीक कार्यक्रमके आयोजना करके वृद्धाश्रमके उदघाटन करल छ । दृष्टि फाउण्डेशनके अध्यक्ष कल्पना भट्टके सभापतित्वमे आयोजित कार्यक्रममे प्रमुख अतिथि गोदावरी नगरपालिकाके नगरप्रमुख विरेन्द्र भट्ट ओ विशिष्ठ अतिथि उपप्रमुख शारदा रोकाया, कैलालीके सहायक प्रमुख जिल्ला अधिकारी किरण जोशी रहल रहिट ।
कार्यक्रममे बोल्टी नगरप्रमुख भट्ट सरकारसे करेपर्ना काम कौनो एक व्यक्तिसे करटी रहल बटैलै । उहाँ सरकारके दायित्वभिटर पर्ना ओ सरकारसे करे नैसेकल कार्य कैना जमर्काे एक ठो महिलासे करल कहटी उहाँ दृष्टि फाउन्डेशनके अध्यक्षप्रति कृतज्ञता ज्ञापन करलै । उहाँ विगतसे दृष्टि फाउन्डेशनहे नगरपालिकासे सहयोग करटी आइलमे अइना दिनमेफे निरन्तर करटी जैना बटैलै । उहाँ फाउन्डेशनके लाग अत्तरियामे जग्गा खोज्न विषयमेफे अपने पहल कैना बटैलै ।
‘पर्खाल नैरहल कारण फाउन्डेशनमे बैठल दिदीबहिनीयाहुकनहे सुरक्षामे चुनौती हुइल कना उहाँ (दृष्टि फाउन्डेशनके अध्यक्ष भट्ट) से हम्रहिनहे जानकारी कराइलपाछे हम्रे गैल वर्ष ५ लाख बराबर बजेट विनियोजन करके पर्खाल निर्माण करे लगाइल रही,’ उहाँ कहलै, ‘अब यहाँ आसेकलपाछे यिहीहे स्थायित्व डेना ६ महिना भिटर केक्रो दावि विरोध नैहुइना करके यकर लाग जग्गाके रेखांकन कैना पहल मै करम ।’ उहाँ समस्या परल खण्डमे अइना दिनमेफे जानकारी करैलेसे अपने सेक्ना सहयोग कैना बटैलै ।
कार्यक्रममे बोल्टी उपप्रमुख शारदा देवी रोकाया सक्कु जाने अपन डाई बाबाहे संरक्षण करटी सम्हरटी आइल हुइलेसे वृद्धाश्रम खोले पर्ना अवस्था नैअइना बटैली । उहाँ छोरल डाईबाबनहे ल्यानके सम्हरटी रहल कहटी दृष्टि फाउन्डेशनके अध्यक्ष भट्टहे धन्यवाद ज्ञापन करली ।
ओस्टेक करके कैलालीके सहायक प्रमुख जिल्ला अधिकारी किरण जोशी समाजके अपन कर्तव्य निर्वाह नैकैना छावाछाईहुक्रे समेत रहल ओरसे यैसिन संस्थाके आवश्यकता महसुस हुइल बटैली । उहाँ संस्थाहे निरन्तर आघे बह्रैना अपन ओरसे पुर्ण सहयोग कैना प्रतिवद्धता समेत व्यक्त करली ।
विगत नम्मा समयसे सडक मानवके सेवामे समर्पित फाउण्डेशनसे अत्तरियामे पहिल चो वृद्धाश्रम सञ्चालनमे ल्याने लागल हो । उदघाटन कार्यक्रममे वडा नं. १ के वडाध्यक्ष एवम् नगरप्रवक्ता गोपालदत्त भट्ट, फाउन्डेसनके संरक्षक नृप ओड, युवा नेता लोकराज पान्डेय आगो, रबिनकान्त पन्त लगायतके सहभागिता रहल रहे ।
फाउन्डेसनके सदस्य पबित्रा धिक्त पान्डेय स्वागत मन्तव्य व्यक्त करल कार्यक्रमके सञ्चालन सञ्चारकर्मी शारदा फुलारा करल रहिट ।
