कैैलारीके बर्षे / बजेट अधिवेशन सम्पन्न

पहुरा समाचारदाता
धनगढी, २३ असार । कैैलारी गाउँपालिका आर्थिक बर्ष २०८१÷०८२ सालके गाउँसभा (बर्षे÷बजेट) अधिवेशन सोम्मारके रोज सम्पन्न हुइल बा ।

गाउँपालिका अध्यक्ष राजसमझ चौधरीके अध्यक्षतामे हुइल दुसरा सभा अधिवेशनमे नीति तथा कार्यक्रम ओ बजेट तथा कार्यक्रम अनुमोदन कैटी नीतिगत निर्णयफे अनुमोदन कैगिल बा ।

सभासे चालु आर्थिक बर्षके असार १५ गते समके आय व्यय, कार्यपालिकासे हुइल करल निर्णय अनुमोदन कैगिल बा । सभासे ऐन, नियम, निर्देशिका, कार्यविधि निमार्णके अधिकार कार्यपालिका प्रत्यायोजन, स्वीकृत बजेट तथा कार्यक्रममे संसोधन कैना अधिकार कार्यपालिकामे प्रत्यायोजन कैगिल बा ।

राजश्व परामर्श समितिसे निर्धारण करल करके दर तथा दायरा संसोधन सहित लागु कैना, निर्माण सम्पन्न योजनाके जाँचपास तथा फरफारक, संघीय तथा प्रदेश सरकारमे योजना माग, संघीय तथा प्रदेश सरकार ओ विकास साझेदारसंग समन्वय, कर्मचारीके तलवी प्रतिवेदन, सेवा करारके कर्मचारीके सेवा करार (म्याद), सेवा, सुविधाके पुनरावलोकन, कर्मचारी संगठन तथा व्यवस्थापन ओ लेखा परिक्षण प्रतिवेदन अनुमोदन कैगिल बा ।

यिहीसे आघे गाउँसभाके पहिल कार्यसूचीमे गाउँपालिका उपाध्यक्ष, विषयगत समितिके संयोजकहुक्रे ओ वडा सदस्यहुक्रे नीति तथा कार्यक्रम ओ बजेटबारे आपन धारण राखल रहिट । सभामे गाउँपालिका उपाध्यक्ष भगवतीकुमारी चौधरी न्यायिक समितिसे कैगिल प्रगती विवरणबारे जानकारी कैटी विकास ओ जनभावना अनुसार बह्रेक लाग समन्वय सहकार्य जैना आवश्यक रहल बटैली ।

सभामे वन वातावरण तथा विपद व्यवस्थापन समिति संयोजक ठागु राम चौधरी, भौतिक पूर्वाधार समिति प्रेमबहादुर चौधरी, आर्थिक विकास समिति विष्णु प्रसाद चौधरी, सामाजिक विकास समिति संयोजक सन्तराम चौधरी, सुशासन विकास समिति संयोजक दिपेन्द बहादुर बम, वडा नम्बर ९ के वडा अध्यक्ष खेमराज डगौरा, वडा सदस्य सैतुराम चौधरी, लक्ष्मीकमारी चौधरी, कृष्णी देवी परियार, टुनीराम चौधरी, किसुनलाल चौधरी, लक्ष्मीकुमारी चौधरी, सन्तराम चौधरी, हरीद्वारी चौधरी, भागदास चौधरी, सुवा परियार, तुलसी प्रसाद चौधरी, मोहनलाल चौधरीलगायत आपन धारण राखल रहिट ।

उहाँहुक्रे अब्बे कैलारीमे एसइईके नतिजा कम्जोर हुइना सक्कु जानेक कम्जोरी रहल कहटी सोचेपर्ना, कृषि विद्युतीकरण हुइटी रहल बेला पावरके बह्राई, संघ ओ प्रदेशसे ठेक्का योजनामे गाउँपालिकाके ओरसे कडाईके साथ अनुगमन करेपर्ना, और स्थानीय तहके तुलनामे संघ ओ प्रदेशके योजना खासे नैपरल विषयमे बाट राखल रहिट ।

कैलारी गाउँपालिकाके उपाध्यक्ष भगवतीकुमारी चौधरी आर्थिक बर्ष २०८२÷०८३ सालके लाग जेठ ८ गते ७२ करोड २५ लाख ३ हजार बजेट प्रस्तुत करल रही ।

आय ओर संघीय सरकारसे सामानिकरण अनुदानमे रु. १४ करोड १८ लाख, राजश्व बाँडफाँडमे रु. १२ करोड ८२ लाख ४६, हजार, सर्शत कार्यक्रम रु ३० करोड ५७ लाख, बिशेष अनुदान रु. ५४ लाख, समपुरक अनुदान रु. २ करोड ६५ लाख करके जम्मा रु. ६० करोड ७६ लाख ४६ हजार प्रस्तुत हुइल रहे ।

प्रदेश सरकारसे सामानिकरण अनुदानमे रु. १ करोड ४३ लाख ८२ हजार, राजश्व बाँडफाँडमे रु. ४३ लाख ४ हजार, समपुरक अनुदान रु. ८५ लाख ओ विशेष अनुदान रु. ५५ लाख करके जम्मा रु. ३ करोड २६ लाख ८६ हजार रहल बा । गाउँपालिका आन्तरिक आयमे रु. २ करोड ५७ लाख, आन्तरीक श्रोत अ.ल्या रु. ४० लाख करके जम्मा रु. २ करोड ९७ लाख रहल बा ।

गाउँपालिकाके कुल जम्मा रु.६७ करोड ३२ हजार, गैरसरकारी संघ संस्थाके कार्यक्रम रु. ५ करोड २४ लाख ७१ हजार करके आर्थिक बर्ष २०८२÷०८३ सालके लाग कुल जम्मा आय रु. ७२ करोड २५ लाख ३ हजार बजेट गाउँपालिकासे प्रस्तुत करल रहे ।
ओस्टेक करके कैलारी गाउँपालिका अध्यक्ष राजसमझ चौधरी आर्थिक बर्ष २०८२÷०८३ सालके लाग नीति तथा कार्यक्रम प्रस्तुत करल रहिट ।