पोषण सुधारके लाग छोटिहीसे ध्यान डेहे परठः गापा उपाध्यक्ष भगवती

पहुरा समाचारदाता
धनगढी, २४ असार । कैलारी गाउँपालिका उपाध्यक्ष पोषण सुधारके लाग छोटिहीसे ध्यान डेहे पर्ना बटैली ।

कैलारी गाउँपालिकाके आयोजनामे मंगरके रोज हसुलियामे हुइल बालविकास शिक्षहुकनके लाग बहुक्षेत्रीय पोषण योजना सम्बन्धी अभिमुखीकरण कार्यक्रममे सम्बोधन करटी उहाँ पोषण क्षेत्रहे सुधारके लाग लर्कन गर्भमे बैठल ठन्से ध्यान डेना बटैली ।

हम्रे घरे खाना टे खैटी हमार खाना पोषणयूक्त बा की नै हो ध्यान डेहे पर्ना बा, गाउँपालिका उपाध्यक्ष कहली, ‘कैलारी गाउँपालिकासे वडा नम्बर ३, ४, ५ ओ ८ नम्बरमे पोषणमैत्री वडा ओ कुछ वडामे बालमैत्री वडा घोषणाके तयारीमे बा । अब्बे भर्खर कुपोषण हुइल लर्कनके डाईनके खाताके पोषण कार्यक्रमके लाग पोषण कार्ड उपलब्ध ओ ओम्ने नगद २५ हजार जमा करले बटी । ओइने आयमुलक कार्यक्रम करके हुइल आम्दानीसे लर्कनके पोषणमे ध्यान डिही ।

पोषणसंगे व्यक्ती तथा घरपरिवारहे सरसफाईमे ध्यान डेहे पर्ना जरुरी रहल गाउँपालिका उपाध्यक्ष बटैली । कैलारीमे अब्बे एसइई परिक्षाके नतिजा कम्जोर डेखल बा । उहीहे सुधार करेक लाग एक्के बरससे नैहुई, सुधारके लाग निरन्तरण मेहनत करेपर्ना ओ बालबालिकाके पह्राईहे छोटेसे मजा बनाइक लाग बालविकास शिक्षकुकनके महत्वपूर्ण योगदान रहल उहाँ बटैली ।
बालविकासके लर्का विद्यालयमे आइलपाछे ढेर समय बालविकास शिक्षकहुकनसंग विटैठै । शिक्षकहुक्रे लर्कनके संस्कारसहित शिक्षा, पह्रना बानीके विकास करैठै । ध्यान डेना जरुरी रहलफे उहाँ कहली ।
छोट लर्कनहे जंङक फु्ड डेना परिपाटी बा । खाना डेहाटी कलेसे घरेपाकल भात, दाल ओ हरियार डेलेसे मजा रना उहाँ बटैली ।

कार्यक्रममे कैलारी गाउँपालिका स्वास्थ्य शाखाके प्रमुख नरेशकुमार चौधरी गाउँपालिकामे पोषणके अवस्था ओ बहुक्षेत्रीय पोषण योजना सम्बन्धी प्रस्तुतीकरण करल रहिट । बालविकास शिक्षकहुकन पोषणमैत्री स्वास्थ्य संस्थाके सूचकबारे जानकारी डेहल रहिट । सूचकमे गर्भवती महिला कम्तीमे ८ चो पूर्व प्रसुती जाँच, गर्भवती महिला कम्तीमे ३ चो उत्तर प्रसुती जाँच करल, गर्भवती महिला गर्भ अवधिभर १८० ठो आइरन चक्की फोलिक एसिड चक्की खाइल हु्ई पर्ना, स्वास्थ्य संस्थामे सुत्केरी कराइल हुई पर्ना सूचकमे रहल बा ।

स्वास्थ्य संस्थामे जन्माइल लर्का १ घण्टामे भिटर स्तनपान सुरुवाट कराइल, ६ से ५९ महिनाके बालबालिकासे बर्षमे दुई चो भिटामिन ए क्याप्सुल खाई हुई पर्ना, १२ से ५९ महिनाके बालबालिकासे बर्षमे दुई चो जुकाके औषधी पाइल, २४ महिनासम्मके बालबालिका नियमित वृद्धि अनुगमन करल, वृद्धि अनुगमनके लाग दर्ता हुईल बालबालिका मध्ये जन्मसे ६ महिनासम पूर्ण स्तनपान कराइल हुई पर्ना लगायत पोषणमैत्री स्वास्थ्य संस्थाके १६ सूचकबारे जानकारी डेहल रहिट ।

समापन कार्यक्रममे बालविकास शिक्षिका मायारानी चौधरी अपनेहुक्रे बालविकासके बालबालिकाहुकन स्यहार सुसारके साथे शिक्षाफे प्रदान करटी रहल बटैली । कार्यक्रममे नौ वडामे रहल बालबालिकाके शिक्षिका, पोषण सहजकर्ता प्रियंका चौधरी, सेतो गुराँस राष्ट्रिय बालविकास कैलारी गाउँपालिका प्रमुख सुरज परियारलगायतके सहभागिता रहे