कैलारीमे वालबालिकाके पञ्चवर्षिय रणनीतिक कार्ययोजनाके समिक्षा
पहुरा समाचारदाता
धनगढी, २५ असार । कैलारी गाउँपालिकामे बालबालिका सम्बन्धी पञ्चवर्षिय रणनीतिक कार्ययोजनाके समिक्षा कैगिल बा ।
बाल कल्याण संघ टीकापुर, वल्र्डभिजन इन्टरनेशनल नेपालके प्राविधिक सहयोग ओ कैलारी गाउँपालिकाके आयोजनामे पञ्चवर्षिय रणनीतिक कार्ययोजनाके समिक्षा कैगिल हो ।
स्थानीयस्तरमे बालबालिकाके अवस्था विश्लेषण प्रतिवेदन तयारी पश्चात प्रतिवेदनमे उल्लेखित बालबालिकाके सवाल न्यूनिकरणके लाग कैलारी गाउँपालिकाके पञ्चबर्षिक रणनीतिक कार्ययोजनाके दुसरा बरसके लाग कैना क्रियाकलापके लक्ष्य उपलब्धी ओ प्रगतीसम्म पुगेक लाग समिक्षा कैगिल बा ।
कैलारी गाउँपलिका क्षेत्रभिटरके बालबालिकाके सवाल ओ उ सवालके योजनाबद्ध तरिकासे समाधान करके बालअधिकारके सुनिश्चितता करटी बालमैत्री बातावरण निर्माणके लाग कैलारी गाउँपालिका ओ वल्र्डभिजन नेपालके साझेदार संस्था बालकल्याण संघके आर्थिक तथा प्राविधिक सहयोगमे बालबालिकाहुकनके अवस्था विश्लेषण प्रतिवेदन तयार करके बालबालिकाके सवालके सम्बोधनके लाग पाँच वर्षभिटर करेपर्ना कार्यक्रमसहित योजना हो ।
गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ बाल अधिकारके क्षेत्रमे गाउँपालिकासे ढेर काम करटी रहलओरसे अध्यावधिक कैना ओ सूचङकमे रहल पुरा कैना कार्य हातोमालो ओ सहकार्य करके आघे बह्रना जरुरी रहल बटैली ।
किशोर किशोरी अब्बे लागु औषध दुव्र्यसनीमे फस्टीगैल, बालविवाहके न्यूनिकरण हुइ नैसेकल ओरसे ओहोरफे ध्यान डेना उहाँ बटैली । कार्यक्रममे कैलारी गाउँपालिका महिला तथा बालबालिका शाखा प्रमुख बालकुमारी चौधरी पालिका ओ टमान संघसंस्थाके सहकार्यमे बालबालिकाके क्षेत्रमे ढेर कार्य हुइल बटैली ।
कार्यक्रममे बालकल्याण संघ टिकापुरके किसन कसारा बालबालिका सम्बन्धी पञ्चवर्षिय रणनैतिक योजनाबारे प्रस्तुतीकरण करल रहिट । कार्यक्रममे यी बरस कैना कार्ययोजनाबारे छलफल करल रहिट । कार्यक्रमके संचालन कैलारी गाउँपालिका सामाजिक विकास शाखा प्रमुख यगम कलेल करल रहिट । समिक्षा कार्यक्रममे वडा अध्यक्षहुक्रे, टमान शाखाके प्रमुख, बाल समितिके सदस्यहुकनके सहभागिता रहे ।
