गुनासो सम्बोधन व्यवस्थापन कार्यविधिबारे छलफल
पहुरा समाचारदाता
धनगढी, २७ असार । कैलारी गाउँपालिकाके गुनासो सम्बोधन व्यवस्थापन कार्यविधिबारे छलफल कैगिल बा ।
कैलारी गाउँपालिकाके आयोजना तथा सामुदायिक विकास केन्द्र डोटी ओ यूनिसेफके प्राविधिक सहयोगमे किशोरी सशक्तीकरण परियोजना अन्र्तगत कैलारी गाउँपालिकाके गुनासो सम्बोधन व्यवस्थापन कार्यविधिबारे छलफल कैगिल हो ।
गाउँपालिका अध्यक्ष राजसमझ चौधरीके अध्यक्षतामे हुइल कार्यक्रममे सामुदायिक विकास केन्द्र डोटीके कार्यक्रम संयोजक तिलक चौधरी उ कार्यविधिबारे प्रस्तुतीकरण करल रहिट ।
गाउँपालिकामे आइल गुनासाहे कैसिक व्यवस्थापन कैना, योजनाके सार्वजनिक परिक्षण, सामाजिक लेखा परिक्षण, सार्वजनिक सुनुवाई, योजनाके जानकारी डेना होडिङ बोर्ड धारे पर्नाबारे छलफल हुइल रहे ।
गाउँपालिका अध्यक्ष राजसमझ चौधरी पालिकामे गुनासा सुनुवाई पेटीका धारल मने लिखित रुपमे गुनासा नैअइना, सामाजिक सञ्जालमे आइल गुनासाहे मन्ना की नै कहलै । उहाँ कहलै, गाउँपालिकासे गुनासो सुनुवाई सम्बन्धी कार्यविधि पहिलेफे बनासेकल ओरसे उहीहे संशोधन करेपरलेसे छलफल कैजाई । ओस्टेक करके सम्पन्न हुइल योजनाके होडिङ बोर्ड धरना उहाँ बटैलै ।
वडा नम्बर ५ वडा अध्यक्ष विष्णु प्रसाद चौधरी कौनोफे योजनाके बारे जनताफे जानकारी पाईपर्ना अधिकार रहल बटैलै । उहाँ कहलै, योजना सम्पन्न हुइलपाछे होडिङ बोर्ड, सार्वजनिक परिक्षण, लेखा परिक्षण ओ सार्वजनिक सुनुवाई कैलेसे जनता आपन ठाउँके लाग बजेटबारे जानकारी पैठै । योजना स्थानीय, प्रदेश ओ संघके केकर सहयोगमे बनल हो जानकारी डेहक लाग होडिङ बोर्ड रख्ना जरुरी उहाँ बटैलै ।
छलफल कार्यक्रममे गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत खगेन्द्रराज जोशी, वडा अध्यक्षहुक्रे, सामुदायिक विकास केन्द्र डोटीके कार्यक्रम अधिकृत करुणा चौधरी, कैलारी गाउँपालिकाके टमान शाखाके प्रमुखहुकनके उपस्थिति रहे ।
