लैंगिक समानताके लाग पुरुष सहभागिता विषयक तालिम

पहुरा समाचारदाता
धनगढी, २९ असार । कैलालीके धनगढीमे अँटवारसे लैंगिक समानताके लाग पुरुष सहभागिता विषयक ५ दिने प्रशिक्षक÷पशिक्षण तालिम सञ्चालन सुरु हुइल बा ।

लैंगिक हिंसा न्यूनिकरण कैना पुरुषके मानसिक सोच परिवर्तन कैना आवश्यक डेखल ओरसे तालिम आयोजा करल दलित महिला अधिकार मञ्च नेपालके अध्यक्ष सावित्रा घिमिरे बटैली ।

तालिममे सहभागी पुरुषहे सिखल बाट समुदायमे लागु कैना घिमिरे आग्रह करली । लैंगिक हिंसा न्यूनिकरणके लाग महिला केल्ह जागरुक हुके नैपुग्न बटैटी उहाँ पुरुषफे उ अभियानमे संगे हुई पर्ना बटैली ।

हिंसा न्यूनिकणके लाग पुरुषके भूमिकाफे अपरिहार्य हुइना अध्यक्ष घिमिरेके कहार्इं बा । ‘हिंसामे महिलासंगे पुरुषफे परल रठै’ अध्यक्ष घिमिरे कहली, ‘मने समाजमे सदा महिला उप्पर केल्ह हिंसा हुइठ कना सोच रहटी आइल बा, हिंसा अन्त्यके लाग पुरुषके सहभागिता ओ सोच परिवर्तन हुइनाफे जरुरी बा ।’

तालिम उदघाटन करटी कैलाली जिल्ला समन्वय समितिके प्रमुख टीका चौधरी भुल लैंगिक हिंसा अन्त्यके लाग महिलासंगे पुरुषके सहभागिता हुइना जरुरी रहल बटैली । हिंसामे महिला केल्ह नैहुके पुरुषफे पर्ना करल उहाँक कहाई बा ।

डिडब्लुआरएफसे समाज परिवर्तनमे महत्वपूर्ण भूमिका निर्वाह करटी आइल भूलके कहाई बा । पितृ सत्तात्मक सोचके कारण अब्बेफे समाजमे भारी विभेद रहल बटैटी समन्वय प्रमुख भूल कहली, ‘छावा चाहठ कना सोचके कारण महिला शारिरीक तथा मानसिक रोगके सिकार हुई पर्ना अवस्था बा, छावा नैहुइल कारण ढेर महिला आत्महत्या कैना बाध्य हुइटी रहल बटै ।’

दलित महिला अधिकार मञ्च नेपालके आयोजना तथा डिसिएके आर्थिक सहयोगमे सञ्चालन हुइल तालिममे कैलारी गाउँपालिका ओ भजनी नगरपालिकाके ३० जाने पुरुषके सहभागिता रहल बा ।