खोपसे बालबालिकाके जीवन सुनिश्चितः मन्त्री खडका
पहुरा समाचारदाता
धनगढी, ३० असार । कैलाली जिल्ला पूर्ण खोप सुनिश्चितता तथा दिगोपना घोषणा हुइल बा ।
सोम्मारके रोज धनगढीमे एक कार्यक्रमके विच सुदूरपश्चिम प्रदेश सरकारके सामाजिक विकास मन्त्री मेघराज खडका जिल्लाके पूर्ण खोप सुनिश्चितता तथा दिगोपना घोषणा करल रहिट ।
घोषणासभामे सम्बोधन करटी मन्त्री खडका खोपसे बालबालिकाके जीवन सुनिश्चितता कैनाके साथे महामारीसेफे रोक्ना काम करल बटैलै । उहाँ कहलै, ‘पहिले पहिले टमान मेरिक नयाँ रोग आइल खोप नैबनल कारण उ महामारीके रुपमे फैलल । खोपके विकासके क्रममे रोग लग्ना कम हुइटी गैल ।
पहिले एक जाने दम्पति ढेर बच्चा जलमाइट । मातृ तथा शिशु मृत्युदर अत्याधिक रहे, अभिनफे कम नैहुइल हो । मने पहिलेक तुलनामे कम हुइल बा । खोपसे लर्कनके जीवन सुनिश्चित हुइलपाछे सन्तानफे कम जलमैना करल मन्त्री खडका कहलै ।
घोडाघोडी नगरपालिकाके नगर प्रमुख खडकबहादुर रावत स्वास्थ्यकर्मीहुक्रे मनैनके लाग जिट्टी भगवान रहल बटैलै । उहाँ कहलै, ‘स्वास्थ्यकमीके कारण जिल्लाके पूर्ण खोप सुनिश्चितता तथा दिगोपना घोषणा कैना सम्भव हुइल बा । पाछे दिनमेफे स्वास्थ्यकर्मीहु्क्रे दत्तचितहुके काम कैना जरुरी बा । नागरिकहुकनके स्वास्थ्य बनाइक लाग सरोकारवाला सक्कु जाने समन्यत्मक भूमिका खेल्ना जरुरी रहल नगर प्रमुख रावत बटैलै ।
सामाजिक विकास मन्त्रालयके सचिव डा. हेमराज रेग्मी मुलुकहे समृद्ध बनैना रोग लग्नासे बचैना जरुरी रहल बटैलै । उहाँ कहलै स्वास्थ्य मनै केल्ह मुलुकहे समृद्ध बनाई सेक्ही, स्वास्थ्य रहेक लाग आहार,विहारमे ध्यान डेना जरुरी बा । रोगसे बचाइकल लाग अब्बे १४ मेरिक खोप लगैना सुरु करल ओ यिहीसे मातृ तथा शिशु मृत्युदरमे कमी आइल बा ।
कैलालीके प्रमुख जिल्ला अधिकारी गोगनबहादुर हमाल जिल्ला पूर्ण खोप सुनिश्चितता तथा दिगोपना घोष्णा हुइना मना बाट करल कहटी काल्हके दिनमेफे ओटरे मेहनत कैना जरुरी बा ।
महिला स्वास्थ्य स्वयं सेविका अम्बिका भण्डारी अपनेहुक्रे निशुल्कमे काम करल मने कामके मुल्यांकन नैहुइल बटैली । उहाँ कहली, महिला स्वास्थ्य स्वयं सेविका कमैना उमेरमे निशुल्क सेवा प्रदान कैना पाछे अवकाश पाईबेर छुच्छे हात लौटना दुःखद बाट हो । कोईं कोई स्थानीय तहमे ६० हजार, ७० हजार, ८० हजार डेहल सुनल बा । मने उ पैसा आजिवन सेवा प्रदान कैलक तुल्नामे कुछ नैरहल कहटी कम्तीमे अवकाश प्राप्त करेबेर ५ लाख डेहे पर्ना ओ सक्कु स्थानीय तहमे एक रुपता ल्यान जरुरी रहल बा ।
जिल्ला स्वास्थ्य कार्यालय कैलालीके निमित्त प्रमुख रमेश कुवँर यी आर्थिक बर्षमे खोज ओ खोप सिद्धान्त अनुरुप घरधुरी सर्वेक्षण करेबेर १५ जाने शुन्य डोज ओ ४४९ जाने आंशिक खोप छुटल पाइलहुकनहे खोप लगाइल बटैलै ।
१५ महिना टरेक बालबालिकाके सर्वेक्षण करेबेर १४ हजार ६४६ बालबालिकाके लगत संकलन करल रहे । १६ महिनासे ५९ महिनासमके बालबलिकाके घरधुरी सर्वेक्षण करेबेर ३ लाख ३० हजार ५९६ जाने लगत संकलन करल उहाँ बटैलै ।
जेम्ने मध्ये ३३ हजार ८५ जाने बालबालिकाहुक्रे पूर्ण खोप प्राप्त करल रहिट ओ शुन्य डोज १६ जाने ओ ड्रपआउट हुइल ४९६ जनहनहे पाछे डिले सेयडुल राष्ट्रिय खोप तालिका अनुसार खोप लगाईल उहाँ बटैलै ।
हाल १४ ठो सरुवा रोग जस्टे (क्षयरोग, भ्यागुतेरोग, लहरेखोंकी, धनुषटंकार, हेपाटाईटीस–वि, पोलियो, दादुरा, रुबेला, निमोनिया, जापानिज ईन्सेफलाईटीस, रोटा ओ टाईफाईड विरुद्ध तथा गर्भवती महिलाहुकनहे लाग टी.डी. खोप निःशुल्क उपलब्ध करैटी आगिल बा ।
खोप कार्यक्रम नेपाल सरकारके उच्च प्राथमिकता प्राप्त कार्यक्रम हो । जनस्वास्थ्यके सफल मध्येके एक कार्यक्रम हो । बाल मृत्युदर घटैना प्रमुख भूमिका रहल बा । हाल कैलाली जिल्लामे ३६१ ठो खोप केन्द्रसे वर्षेनी करिब १५ हजार जाने बालवालिकाहे खोप लगैना कार्य करजाइठ । वर्षेनी १५ हजार जनहनहे १४ ठो रोग विरुद्ध उन्मुक्ति डेहुवइना कार्य स्वास्थ्यकर्मीहुक्रे ओ महिला सामुदायिक स्वास्थ्यकर्मीहुक्रे कैटी रहल बटै ।
नेपाल सरकारके पूर्ण खोप सुनिश्चितता निर्देशिका २०७१ बमोजिम बडा, गाउँपालिका÷नगरपालिका करेपर्ना क्रियाकलाप तोकल बा ।
यी जिल्लाहे सर्वप्रथम २०७४ अगहन २६ गते पूर्ण खोप सुनिश्चित जिल्ला घोषणा करल रहे । यि पाछे क्रमसः २०७९ असार ३१ गते, २०८० साल असार २७ गते, ओस्टेक करके २०८१ साल असार ३० गते जिल्ला पूर्ण खोप सुनिश्चित करल रहे ।
यिहे विच १३ स्थानीय तहके १३ जाने महिला स्वास्थ्य स्वास्थ्य सेविका, १३ जाने खोपकर्ता सम्मान, १३ स्थानीय तहहे पूर्ण खोप सुनिश्चितता घोषणा कैलकमे प्रशसां पत्र ओ पूर्ण खोप सुनिश्चितता करैनामे सहयोग करल संघसंस्थाहे प्रशंसापत्र प्रदान कैगिल बा । जिल्ला पूर्ण खोप समन्वय समिति कैलालीके संयोजक तथा जिल्ला समन्वय समितिके सभापति टीकाुमारी चौधरी भुलके अध्यक्षतामे हुइल कार्यक्रमके संचालन जनकराज जोशी करल रहिट ।
