बलात्कारके घटना बह्रलः ओरेक
पहुरा समाचारदाता
धनगढी, २ सावन । महिला पुनस्र्थापना केन्द्र (ओरेक) सुदूरपश्चिम प्रदेशसे तीन महिनाके घटनाके तथ्याङक सार्वजनिक करटी बलात्कारके घटना बह्रल जनैले बा ।
अप्रिलसे जुन २०२५ समके घटनाके तथ्याङ्क सार्वजनिक करटी सुदूरपश्चिम प्रदेशके कैलाली जिल्लामे यौन दुव्र्यवहार ओ बलात्कारके घटना दैनिक रुपमे बह्रटी गैल तथ्य ओरेकसे दस्तावेजिकण करल तथ्याङ्कसे पुष्टि करले बा ।
अप्रिलसे जुन २०२५ समके अबधिमे सुदूरपश्चिम प्रदेशके कैलाली जिल्लासे लैङ्गिक विभेदमे आधारित हिंसाके कुल २२ ठो घटना अभिलेखिकरण करल ओरेक नेपालके प्रदेश संयोजक सपना थापा जनैली ।
ओम्नेसे यौन हिंसा ३६ प्रतिशत अर्थात ८ ठो घटना यौन हिंसाके रहल बा । जौन अन्तर्गत बलात्कार ६३ प्रतिशत (५ ठो), यौन दुब्र्यबहार २५ प्रतिशत (२ ठो) ओ बैबाहिक बलात्कार १२ प्रतिशत (१ ठो) घटना रहल उहाँ जनैली ।
यौन हिंसाके कुछ प्रतिनिधि मुलक घटनामे धनगढीके एक विद्यालयमे अध्ययनरत छात्रा अपने प्रशिक्षकसे बलात्कारमे परल घटना बहिरल बा । विद्यालयमे अध्ययनरत १३ वर्षीया बालिका उप्पर तेक्वान्दो खेलुइया प्रशिक्षकसे ललाई फकाई, धम्काई कबु होटलमे टे कबु खेल्न कार्यालयमे बार बार बलात्कार कैना ओ बलात्कार करल पश्चात सक्कु प्रमाणनष्ट कैना ओ लहाई लगैनासमेत कैगिल पागिल बा । बार बारके बलात्कारसे बालिकाहे अत्यधिक रक्तश्राव हुई लागलपाछे उ घटनाबारे अपन डाईहे बटैली । यी पाछे इलाका प्रहरी कार्यालयमे आरोपित प्रशिक्षकविरुद्ध जबरजस्ती करणीके किटानी जाहेरी दर्ता करल बा ।
आरोपित प्रशिक्षक भर फरार हुइल बटै । प्रशिक्षकके आफन्तसे प्रभावित बालिकाके परिवारहे तोर छाई ओस्टे कहटी मानसिक तनाब डेना ओ घरबेटीसे ओइने बैठटी आइल कोठा खाली कैना ओ टोलबासीसे समेतबस्ती छोरना दबाब डेहे लागल संयोजक थापा बटैली ।
यहोर बिद्यालयसे भर प्रेस विज्ञप्ती जारी करटी विद्यालयके हाताभिटर तेक्वान्दो प्रशिक्षण करटी आइलेसेफे आरोपित शिक्षक वा प्रशिक्षक अपन विद्यालयके नैरहल स्पष्टीकरण डेटी विद्यालयके बदनाम करल कहटी संचारमाध्यमहे आरोप लगैटी रहल बटै ।
ओस्टेक करके कैलालीके १३ वर्षिय बालिका २०८२ असार ७ गते दुपहर घर लग्गेक बनुवामे छेगरी चराई गैल क्रममे अपने छिमेकके एक जाने २३ बर्षिय पुरुषसे ऐक्केली रहल मौका छोपके मुह थुनके चिल्लाई नैडेके जबरजस्ती बलात्कार करके भागल बटै । बालिकाके डाईबाबाफे रोजगारीके सिलसिलामे घर बाहेर गैल ओरसे कुहीहे कहे नैसेकल रहिट । यौनिसे रगत बहटी रहे, उहाँहे गाह्रो हुई लागलपाछे संघरीयाहे घटना ओ अपन समस्या सुनैली । संघरीया असार ११ गते बालिकाके बुडीहे घटनाबारे सक्कु बाट बटैली । बुडी बालिकाके डाईबाबाहे जानकारी कराइलपाछे डाईबाबा गाउँक बुद्धिजिवी, भल्मन्साके सहयोगमे इलाका प्रहरी कार्यालयमे जाके उजुरी डेलै । इलाका प्रहरी कार्यालयसे उहे दिन पीडकहे पकरके जिल्ला प्रहरी कार्यालय पुगाइल रहे । ओरेक ओ ओसिएमसिके सहयोगमे ०८२ असार १२ गते मुद्दा दर्ता हुइल रहे ।
यी दुनु घटना अत्यन्तजघन्य प्रकृतिकेहुइट । विद्यालय जौन विद्यार्थीके लाग सबसे सुरक्षित थलो हुई पर्ना हो, उहे ठाउँ असुरक्षित बनल बा । विशेषगरी बालिकाके लाग यी अवस्था आउर चिन्ताजनक रहल ओ प्रशिक्षक जैसिन जिम्मेवार व्यक्तिसे विद्यालय परिसरमे यौन दुब्र्यबहार ओ कार्यालयमे बलात्कार हुईबेरसमेत बिद्यालय प्रशासनसे प्रशिक्षक अपन अनुमतिमे नैरहल कहटी प्रेस बिज्ञप्ति निकरटी स्पष्टीकरण डेना ओर लग्ना, बैठटी रहल कोठा ओ बस्तीसे निकरना दबाब डेना अत्यन्तक्रुर ओ गम्भीर विषय रहल संयोजक थापा बटैली ।
अप्रिलसे जुन,२०२५समके अवधिमे सुदूरपश्चिम प्रदेशके कैलाली जिल्लामे केल्ह यौनहिंसाके घटना कुल लैङ्गिक हिंसाके ३६% मे हुइल तथ्याङ्कसे बालिकार महिलाउप्पर हुइना हिंसाके अवस्था गम्भीर रहल स्पष्ट करठ । बालिकाउप्पर विद्यालय, घर, जंगलजैसिन सार्वजनिक स्थानमे यौन हिंसा हुइना कहल समाजके सुरक्षा संरचना, शिक्षा प्रणाली, कानुनी संयन्त्र ओ राज्यके नीति सक्कु तहमे कमजोर ओ उदासिनता रहल पुष्टि हुइठ ।
