धनगढीसे तीन वर्षमे ४८८ जनहनहे निःशुल्क अपाङ्गता सहायता सामग्री वितरण
पहुरा समाचारदाता
धनगढी, २ सावन । धनगढी उपमहानगरपालिकासे तीन वर्षमे जम्मा ४८८ जनहनहे निःशुल्क अपाङ्गता सहायता सामग्री वितरण करल धनगढी उपमहानगरपालिकासे जनैले बा ।
धनगढी उपमहानगरपालिकासे लगातार टिसरा वर्ष अपाङ्गता हुइल व्यक्तिहुकनहे खोजीखोजी सहायता सामग्री वितरण करले बा ।
आर्थिक वर्ष २०७९÷८० मे सुरू करल निःशुल्क सहायता सामग्री वितरण कार्यक्रमसे २०८१÷८२ मे फे निरन्तरता पाइल उपमहानगरसे जनैले बा ।
धनगढी उपमहानगरपालिकासे पाँच क्लस्टरमे विभाजन करके अगहन २३ से २७ गतेसम स्क्यानिङ क्याम्प सञ्चालन करल रहे ।
स्क्यानिङ क्याम्प क्रमशः वडा नम्बर १४ फूलबारी, वडा नम्बर १५ उर्मा, वडा नम्बर ९ सहित जुगेडा क्लस्टर, वडा नम्बर ६, ११ ओ १३ मे सञ्चालन ह्ुइल रहे । अगहन २७ गते उपमहानगरपालिकाके प्राङ्गणमे अन्तिम क्याम्प करल रहे ।
उ स्क्यानिङ क्याम्पमे १४३ जाने सहभागी हुइल रहिट । जौन मध्ये १२२ जनहनहे सहायता सामग्रीके लाग स्क्यानिङ करके विवरण संकलन करल बा ।
उपमहानगरके अनुसार स्क्यानिङपाछे आवश्यक विवरणके आधारमे ओइनहे सामग्री वितरण करल बा ।
आर्थिक वर्ष २०७९÷८० मे १५० जाने ओ २०८०÷८१ म्े २१६ जाने अपाङ्गता हुइल व्यक्तिहुकनके सहायता सामग्री वितरण करल बा ।
तीन वर्षमे जम्मा ४८८ जनहनहे निःशुल्क अपाङ्गता सहायता सामग्री वितरण करल धनगढी उपमहानगरपालिकासे जनैले बा । उपमहानगरसे अपाङ्गता हुइल व्यक्तिहुकनहे दैनिक जीवन सहज बनाइक लाग यी कार्यक्रम निरन्तर सञ्चालन करटी आइल बा ।
