नेपाल–भारत मैत्री रक्तदान कार्यक्रममे ३२ जाने रक्तदान
पहुरा समाचारदाता
धनगढी, ३ सावन । धनगढीमे शनिच्चर आयोजित नेपाल–भारत मैत्री रक्तदान कार्यक्रममे ३२ जाने रक्तदान करले बटै ।
नेपाल– भारत मैत्री संघ जिल्ला कार्य समिति कैलालीके आयोजनामे रक्तदान कार्यक्रम करल रहे । नेपाल–भारत मैत्री संघके केन्द्रीय उपाध्यक्ष एबम सुदुरपश्चिम प्रदेशके अध्यक्ष हरिशंकर ठाकुरके अध्यक्षतामे हुइल रक्तदान कार्यक्रममे टमान स्वयमसेवी रक्तदाताहुक्रे रक्तदान करल उपाध्यक्ष ठाकुर बटैलै ।
रक्तसंचार केन्द्रमे रगतके अभाव हुइल जानकारी पाइलपाछे सुदुरपश्चिम प्रदेशके रक्तदाता सदभावना दुत दीपक उपाध्यायके समन्वयमे रक्तदान कार्यक्रम करल केन्द्रीय उपाध्यक्ष ठाकुर बटैलै ।
ठाकुर मोटर्स प्रालीके बिशेष सहयोगमे महिन्द्रा सोरुमके प्रांगणमे आयोजित रक्तदान कार्यक्रममे नेपाल रेडक्रस सोसाइटी धनगढी ५ नम्बर उपशाखाके सहयोग ओ नेपाल रेडक्रस सोसाइटी प्रादेशिक रक्तसंचार सेवा केन्द्रसे प्राविधिक सहयोग करल रहे ।
