नहरमे डुबके एक जानेक मृत्यु

पहुरा समाचारदाता
धनगढी, ३ सावन । कैलालीके लम्की चुहानगरपालिका– ६ बाघमारा, रानीजमरा कुलरिया सिँचाइ आयोजनाके नहरमे लहैना क्रममे डुबके शनिच्चरके रोज एक जानेक मृत्यु हुइल बा ।

मृत्यु हुइना दैलेख आठबिस नगरपालिका– २ के २२ वर्षीय प्रेम रसाइली रहल इलाका प्रहरी कार्यालय लम्कीके प्रमुख प्रहरी निरीक्षक लोकेन्द्रबहादुर सिंह जानकारी डेलै । रसाइली लम्कीचुहा– ६ गुलरास्थित ससुराली घरमे बैठटी आइल रहिट ।

कुछ समययहोर जिल्लामे पानीमे डुबके मृत्यु हुइना सख्या बढटी रहल बा । शुकके केल्ह गौरीगङ्गा नगरपालिकास्थित लडिया डुबके एक्के परिवारके डाडुभैयाके मृत्यु हुइल रहे ।

उहे नगरपालिका–११ ऐठाके लालु धामीके २५ वर्षीय छावा उमेश धामी ओ २० वर्षीय प्रकाश धामीके लिक्मा लडियामे डुबके मृत्यु हुइल रहे ।