कैलालीमे लागु औषधके अवस्था भयवाह

पहुरा समाचारदाता
धनगढी, ३ सावन । कैलाली जिल्लामे लागु औषध दुव्र्यशनीके अवस्था भयवाह बन्टी गैल डेखल बा ।

जिल्ला प्रहरी कैलालीके तथ्याङकमे अनुसार कैलाली जिल्लामे लागु औषध दुव्र्यशनीके अवस्था गैल बरसके तुलनामे यी बरस झन भयवाह बनल डेखल हो । जिल्ला प्रहरी कार्यालय कैलालीके प्रहरी नायव निरिक्षक दर्शन खडकाके अनुसार गैल बरसके तुलनामे यी बरस अवैध लागु औषधमे पक्राउ परुइयाके सख्या बह्रल बटैलै ।

आर्थिक बर्ष २०८०÷०८१ सालमे ४४७ जाने पक्राउ परलमे यी आर्थिक बर्ष २०८१÷०८२ सालके असार २४ गतेसम ७२० जाने पक्राउ परल उहाँ बटैलै ।

उहाँ कहलै, आर्थिक बर्ष २०८०÷०८१ सालमे जिल्ला प्रहरी कार्यालय कैलाली ओ मातहत समेतमे जम्मा १७ सय ३३ ठो मुद्दा दर्ता हुइलमे लागु औषध सम्बन्धी ३ सय १५ ठो मुद्दा दर्ता हुके ४ सय २० जाने पुरुष ओ २७ जाने महिला करके जम्मा ४ सय ४७ जनहनहे पक्राउ करके अनुसन्धान कैगिल बा । यी अवधीमे ३१ किलो ७५३ ग्राम चरेश, ३१३ ग्राम ६२९ मिलिग्राम खैरो हिरोईन, ८५ ट्याबलेट नाइट्राभेट, २३० ट्यावलेट स्पास्मो, ९६ प्रि. गाभा ओ २ किलो गाजा बरामद करल रहे ।

ओस्टेक करके आर्थिक बर्ष २०८१÷०८२ सालके असारसम जिल्ला प्रहरी कार्यालय कैलाली ओ मातहत समेतमे जम्मा १९ सय ६६ ठो मुद्दा दर्ता हुइलमे लागु औषध सम्बन्धी ४ सय ५७ ठो मुद्दा दर्ता हुके ६ सय ८० जाने पुरुष ओ ४० जाने महिला करके ७२० जनहनहे पक्राउ करके अनुसन्धान कैगिल प्रहरी नायव निरिक्षक खडका बटैलै ।

यी अवधिमे ७३ किलो ७४३ ग्राम ४५० मिलिग्राम चरेश, ७०१ ग्राम ९३० मिलिग्राम खैरो हेरोईन, ३ किलो ८७२ ग्राम १५० मिलिग्राम गाँजा ओ प्रतिबन्धित औषधी नाइट्राभेट, ट्रमाडोल समेट अन्य ७ हजार १५९ ट्याबलेट बरामद करल उहाँ जनैलै ।
प्रमुख जिल्ला अधिकारी गोगनबहादुर हमाल लागु औषध नियन्त्रण प्रहरीके केल्ह नैहोके यकर नियन्त्रण कैना सक्कु जानेक दायित्व रहल बटैठै । नियन्त्रण कैना सबसे ढेर डाई बाबाके हो । छावा छाईके का करटै । कहाँ जाइटै किहीसे भेट करटै ध्यान डेना जरुरी बा ।

उहाँ कहलै, जिल्ला प्रहरी कार्यालय कैलाली लागु औषध नियन्त्रण कैना कार्यविधि बनाके कार्यान्वयनमे जाइटा । यिहीहे कार्यान्वयन कैना वडा वडामे अभियानके रुपमे जाई पर्ना बा ।

लागु औषध नियन्त्रण कैना अभियानके रुपमे लैजैना ओ यूवाहुकनके उत्पादनशिल कामसे जोरना जरुरी बा, प्रजिअ हमाल कहलै । लागु औषध ओ सीमा क्षेत्रसे हुइना सामान तस्कारी रोक्ना सुरक्षा निकाय, स्थानीय सरकार ओ जनसमुदायके समन्वय आवश्यक रहल कैलालीके प्रमुख जिल्ला अधिकारी गोगन हमाल बटैले बटै ।

सुदूरपश्चिम प्रदेश प्रहरी प्रमुख प्रहरी नायव महानिरिक्षक डम्बर बहादुर विक गैल बरसके तुलनामे यी बरसके तथ्याङक हेरेबेर लागु औषध दुव्र्यशनीके समस्या ओस्टे भयवाह रहल, हिरासात, कारागारामे रहल हुकनके अवस्था हेरलेसे ओस्टे पत्ता चल्ना बटैठै । खुला सीमा नाकाके कारण समस्या बा, प्रहरीहुकनहे गस्ती बह्रैना निर्देशन डेहल बा, यम्ने अभिभावक लगायतके भूमिका रहे पर्ना जरुरी रहल उहाँ बटैठै ।

लागु औषध सहित चार जाने पक्राउ

कैलालीके अलग अलग ठाउँसे अवैध लागु औषधसहित चार जाने पक्राउ परल बटै ।

कैलालीके धनगढी उ.म.न.पा.३ त्रिनगर पोष्टस्थित जिल्ला डोटी, दिपायल सिलगडी न.पा.३ बैठना बर्ष १९ के दिपेन्द्र नेपालीहेह १ ग्राम ७१० मिलिग्राम लागुऔषध खैरो हेरोइनसहित पक्राउ कैगिल बा ।

जिल्ला प्रहरी कार्यालय कैलाली ओ प्रहरी चौकी त्रिनगर, कैलालीसे संयुक्त रुपमे खटल प्रहरी टोलीसे नियन्त्रणमे लेके ठप अनुसन्धान कैटी रहल बा ।

ओस्टेक धनगढी उ.म.न.पा.१० सिमलघाटसे भारत लखिमपुर खिरी सुडा बैठना बर्ष २५ के कल्लु रानाहे १ ग्राम ४३० मिलिग्राम लागूऔषध खैरो हेरोइनसहित पक्राउ करले बा । अस्थाई प्रहरी पोष्ट जुगेडा, कैलालीसे खटल प्रहरी टोली नियन्त्रणमे लेहल रहे ।
ओस्टे जानकी गा.पा.४ बेलपुरसे उहे ठाउँ बैठना बर्ष २५ के निरज कठरिया ओ बर्ष २० के अमन बडायकहे २ ग्राम ३१० मिलिग्राम लागूऔषध खैरो हेरोइनसहित पक्राउ कैगिल प्रहरी जनैले बा ।

जिल्ला प्रहरी कार्यालय कैलाली ओ इलाका प्रहरी कार्यालय टिकापुर, कैलालीसे संयुक्त रुपमे खटल प्रहरी टोली नियन्त्रणमे लेके थप अनुसन्धान कैटी रहल जिल्ला प्रहरी कार्यालय कैलाली जनैले बा ।