आगलागीसे आठ सटरके सामान जरल

पहुरा समाचारदाता
धनगढी, ५ सावन । कैलालीके धनगढी उ.म.न.पा.०४ नाष्ट कलेज पसलमे आगलागीहुके आठ सटरके सामान जरके नष्ट हुइल सुदूरपश्चिम प्रदेश प्रहरी कार्यालय धनगढी जनैले बा ।

अँटवार रात करिब ११ बजेक समयमे विश्व प्रकाश कडेलसे संचालन करल हेलेन ट्रेड सप्लायर्सके चार ठो सटर, परिवर्तन इन्पेक्स कपडाके होलसेल पसलके ३ सटर ओ कडेलसे संचालन करल सेन्टर पोईन्ट रेस्टुरेन्ट करके जम्मा ८ ठो सटरमे बिजुलीके तार सर्ट हुके आगलागी हुइल रहे ।

परिवर्तन इन्पेक्स कपडाके होलसेल पसलके लुगा कपडा लगायतके सरसामान जरके पुर्ण रुपमे नष्ट हुइल प्रहरी जनैले बा । तीन ठो सटर ओ रेस्टुरेन्टमे ठोर ठोर क्षति हुइल बा । विश्व प्रकाश कडेल जम्मा मिलाके आठ करोडके क्षति हुइल दाबी करले बटै ।

आगलागी स्थानीय, प्रहरी, सशस्त्र प्रहरी ओ दमकलके सहयोगमे नियन्त्रणमे आइल रहे ।