लागु औषधसहित चार जाने पक्राउ

पहुरा समाचारदाता
धनगढी, ५ सावन । कञ्चनपुरके अलग अलग ठाउँसे चार जाने अवैध लागु औषधसहित पक्राउ परल बटै ।
सुदूरपश्चिम प्रदेश प्रहरी कार्यालय धनगढीसे डेहल जानकारी अनुसार कञ्चनपुरके कृष्णपुर न.पा.६ सिंहपुर राना टोल स्थित भिटर सडक खण्डसे तीन जनहनहे पक्राउ कैगिल बा ।

लागुऔषधके ओसार पोसार हुइटी रहल बा कना गोप्य सूचनाके आधारमे पश्चिमसे पुर्वओर अइटी करल बा ४६ प ७७३९ नम्बरके मोटरसाइकलहे शंका लाग चेकजाँच करेबेर मोटरसाइकल चालक उहे ठाउँ बैठना बर्ष ३१ के आकाश राना, मोटरसाकल पाछे बैठुइया बर्ष २५ के रोशन बोगटी ओ मौरीफाँटा बैठना बर्ष १९ के भवन बोगटीहे ४ ग्राम २२० मिलिग्राम लागुऔषध खैरो हेरोइनसहित पक्राउ कैगिल बा । मोटरसाइकलसहित ओइनहे इलाका प्रहरी कार्यालय गुलरिया, कञ्चनपुरसे खटल प्रहरी टोली नियन्त्रणमे लेके ठप अनुसन्धान कैटी रहल बा ।

ओस्टेक करके कञ्चनपुरके पुनर्वास न.पा.११ डोकेबजार स्थित चेकप्वाईन्टमे भारतसे नेपालओर अइटी रहल अवस्थामे जिल्ला कैलाली, धनगढी उ.म.न.पा.०४ चौराहा बैठना वर्ष १९ के आयुष मल्लहे २ ग्राम ४० मिलिग्राम लागूऔषध खैरो हेरोइनसहित पक्राउ कैगिल बा । प्रहरी चौकी परासन, कञ्चनपुरसे खटल प्रहरी टोली नियन्त्रणमे लेके ठप अनुसन्धान कैटी रहल बा ।