बीपीके सिद्धान्त अवलम्बन नैकरलेसे कांग्रेस संकटमे पर्ना चेतावनी

पहुरा समाचारदाता
धनगढी, ७ सावन । नेपाली कांग्रेसके संस्थापक नेता बी.पी. कोइरालाके ४३ औं स्मृति दिवसके अवसरमे धनगढीमे एक विशेष कार्यक्रम कैगिल बा ।

४३ स्मृति दिवसके अवसर पारके धनगढीस्थित बी.पी. स्मृति भवनमे “राष्ट्रियता, लोकतन्त्र ओ समाजवाद” विषयक अन्तरसम्वाद कार्यक्रम कैगिल हो ।\

नेपाली कांग्रेस जिल्ला कार्यसमिति कैलालीके आयोजनामे सम्पन्न उ कार्यक्रममे पार्टीके केन्द्रीय नेता रणबहादुर रावल प्रमुख अतिथि रहल रहिट । कार्यक्रमके समन्वय नेपाली कांग्रेस क्षेत्र नं. ५ क्षेत्रीय कार्यसमिति ओ धनगढी नगर कार्य समितिसे करल रहे ।

प्रमुख अतिथि रणबहादुर रावल बीपी कोइरालाहे केवल नेपाली कांग्रेसके केल्ह नैहो विश्वसे चिन्हल नेता कहटी उहाँक सिद्धान्त विश्वस्तरमे स्वीकारल बटैलै । उहाँ पार्टीभिटरके कमजोरी ओ गुटबन्दीके अन्त्य करके बीपीके विचारहे एकजुट हुके अवलम्बन करेपर्नामे जोड डेलै । “पार्टीभिटर हम्रे सक्कुहुनमे कमजोरी बटै, मने आत्मसमीक्षा ओ सुधारसे केल्ह कांग्रेस बल्गर बनी,” उहाँ कहलै ।

कार्यक्रममे विशिष्ट अतिथि केन्द्रीय सदस्य नृप बहादुर ओड पार्टीभिटर डेखल असन्तुलनप्रति चासो व्यक्त करलै । “आज कांग्रेसभिटर मै बनैना सक्कु जाने तल्लिन हुके संगठन कमजोर हुइल बा, हम्रे सक्कुहुनमे मै नाही हम्रे अर्थात् संगठन बनैना लागेपर्नामे जोर डेलै ।” उहाँ स्पष्ट रूपमे कहलै, अइना २०८४ के निर्वाचनके लाग केल्ह नाही, सक्कु चुनावके लाग नेपाली कांग्रेस ओ कार्यकर्ता तयार रहेपर्ना समेत विशेष जोड डेलै ।

२०१५ सालमे बीपी कोइरालासे समावेशी बनाइल नेपाली कांग्रेस पार्टीहे अब्बे हम्रे समावेशी बनैबी कहटी भारी भाषण कौनोफे नेतासे डेहे नैहुइना समेत उहाँ जिकिर करलै ।

कार्यक्रममे कांग्रेसके केन्द्रीय सदस्य डा. जीवन राना, जिल्ला सचिव नृपबहादुर सुनार ओ केशव मिश्र, क्षेत्र नम्बर ५ के क्षेत्रीय सभापति भीम पडाललगायत नेताहुक्रे बी.पी कोइरालाके योगदानके चर्चा करटी बी.पीके मार्गदर्शनअनुसार संगठन सुदृढ बनाईपर्नामे जोड डेलै ।

उपस्थित अन्य नेताहुक्रेफे बीपीवादहे नेपाली कांग्रेसके मूल डगर कहटी उहीसे विचलित हुइलेसे पार्टी कमजोर हुइना चेतावनी डेले रहिट । ओइने पार्टीभिटरके अहमतावाद अन्त्य करटी सिद्धान्तमे आधारित संगठन निर्माणमे जोड डेले बटै । कार्यक्रममे प्रदेश समितिके पदाधिकारीहुक्रे, जिल्ला, क्षेत्रीय ओ नगर कार्यसमितिके नेताहकनके साथे तरुण दल ओ नेविसंघके पदाधिकारीहुकनके समेत उल्लेखनीय उपस्थिति रहल रहे ।