कैलालीके छटकपुर बसन्तामे हरेरी पुजा सुरु

पहुरा समाचारदाता
धनगढी, ९ सावन । कैलाली जिल्लाके कैलारी गाउँपालिका–७ छटकपुर बसन्तामे शुकके हरेरी पुजा सुरु हुइल बा ।

धानवालीमे किरा, रोग व्याधि नालागिट ओ धानवाली सप्रे कहिके हरेरी पुजा करेलागल देशबन्धिया गुरूवा दुर्गा प्रसाद चौधरी बटैलै ।

उहाँ कहलै, आज सन्झयाके अखरिया खेल्जाई ओ काल्ह खेटवामे खिरभान (साजल दुध) डारजाई । देशबन्धिया गुरुवाहे केसौका राजकुमार चौधरी पुजापाठ करैनामे सहयोग करल रहे ।

गाउँक भल्मन्सा धनिराम चौधरी धान वालीहे बचाइक लाग पुर्खौली परम्परा अनुसार हरेरी पुजा करलागल बटैलै ।
थारू संस्कृति ओ पुर्खौली रिति अनुसार हरेरी पुजा हर्षोल्लासके साथ मनैटी रहल गाउँक पूर्व भल्मन्सा जियाराम चौधरी बटैलै । हरेरी पुजामे सहायक भल्मन्सा गेदुराम चौधरीलगायत गाउँके १ सय ९७ घरधुरीके किसानहुँक्रके सहभागिता रहल रहिट ।