धनगढीहे सुन्दर ओ पर्यावरणमैत्री बनैना वृक्षारोपण कैटी

पहुरा समाचारदाता
धनगढी, ११ सावन । कैलालीके धनगढीहे सुन्दर ओ पर्यावरणमैत्री बनैना धमाधम वृक्षारोपण कैटी बा । हरियाली प्रवद्र्धन कार्यक्रमअन्तर्गत वृक्षारोपण अभियानहे तीव्ररूपमे आघे बह्राके ‘हरित धनगढी’ अभियानअन्तर्गत वृक्षारोपण करटी आइल हो ।

हालसम लगागिल टमान प्रजातिके झण्डे २१ हजार टेलुवा

सुन्दर ओ हरियालीयुक्त धनगढी बनैना उद्देश्यसहित सुरु करल ‘हरित धनगढी’ अभियान कार्यक्रममे पछिल्का दिनमे नागरिक तथा टमान संघसंस्थाके सहभागिताफे बह्रटी गैल बा । धनगढी उपमहानगरपालिकाके अगुवाइमे हरियाली प्रवद्र्धन कैना ओ पर्यावरणमैत्री बनैना उद्देश्यसे ‘हरित धनगढी’ अभियानमे टमान प्रजाति तथा फलफूललगायतके टेलुवा लगैना करल बा ।

२०७९ फागुनसे सुरु करल उपमहानगरपालिकाके यी अभियानमे टमान संघसंस्था, व्यक्तिके पहलमे हजारौँ टेलुवा लगाइल बा । हराभरासहितके सुन्दर ओ पर्यावरणमैत्री बनैना धनगढी हरियाली प्रवद्र्धन कार्यक्रम सुरु करल धनगढी उपमहानगरपालिका जिन्सी शाखा प्रमुख कृष्णराज जोशी बटैलै ।

शाखा प्रमुख जोशीके अनुसार हरियाली प्रवद्र्धन कार्यक्रम अन्र्तगत धनगढीके टमान ठाउँमे १६ हजार ४५५ टमान प्रजातिके रुखुवक टेलुवा लगाइल बा कलेसे धनगढीमे रहल ५४ सामुदायिक विद्यालयमे टमान फलफूलके चार हजार ५०० बोट करके हालसम २० हजार ९५५ बोटविरुवा लगाइल बा ।

लगाइल बोटमे अमरुट, आम, बडहर, लिच्ची, जाम, किम्बु, अमलालगायतके फलफूलके रहल बटै कलेसे सिता अशोक, गोल्डमहर, टिकोमा, एरिका, गुलमोहर, नन्दन, धुपी, चाँदनी, खमारी, मेन्दुला, टाँकीलगायत रुखुवा ओ टमान प्रजातिके फूलाके टेलुवा रहल बटै ।

पर्यावरण संरक्षण कैना वृक्षारोपण अभियानमे हालसम टमान संघसंस्था ओ जनस्तरसे करके झण्डै दुई करोड रुप्या सहयोग प्राप्त हुइल धनगढी उपमहानगरपालिका जनैले बा । पर्यावरण संरक्षण कैना वृक्षारोपण अभियानमे सबसे ढेर जाउलाखेल ग्रुप अफ इन्डस्ट्रिज ओ सूर्य नेपाल प्रालिसे ५०÷५० लाख ओ धनगढीस्थित नवजीवन सहकारी संस्था लिमिटेडसे १० लाख रुप्या सहयोग करल शाखा प्रमुख जोशी जानकारी डेलै ।

हराभारा सहितके सुन्दर ओ पर्यावरणमैत्री बनैना प्लाष्टिक बेचबिखन कैनासमेत प्रतिबन्ध लगाइल धनगढी उपमहानगरपालिकासे हालसम धनगढीके मोहनापुल–अत्तरिया ६ लेन सडक, धनगढी चौराहसे कैलालीपुल, वनदेवी मन्दिर क्षेत्र, हुलाकी राजमार्ग, धनगढी विमास्थल सडक, चक्रपथ सडक, हसनपुर डिभोटी होटल अगाडी निसर्ग अस्पतालसे दाहाल चोक, मालपोत रोड, क्याम्पसरोड, मोहना आर्यघाटलगायतके क्षेत्रमे तारबारसहितके वृक्ष कवच (ट्री गार्ड) लगाके वृक्षारोपण करल बा ।

लगाइल टेलुवाहे नियमित मलजल ओ गोडमेल एवं संरक्षण कैना काम उपमहानगरपालिकासे करटी आइल धनगढी नगरप्रमुख गोपाल हमाल बटैलै । सुन्दर ओ पर्यावरणहे जोगैना उपमहानगरपालिकासे नागरिकहे सँगसँगे जोरल बा ।
उहाँ कहलै–‘धनगढीहे सुन्दर ओ पर्यावरणमैत्री बनैना उपमहानगरपालिकासे ‘हरित धनगढी’ अभियान कहिके नियमितरुपमे वृक्ष कवच (ट्री गार्ड) सहित वृक्षारोपण ओ ओकर संरक्षण कैना काम करटी रहल बा । ट्री–गार्डमे कौनौ संघसंस्था तथा ब्यक्तिसे अपन कौनो सन्देश ओ दिवंगत आफन्त सम्मानमे नाम धारे चाहलेसे प्रति ट्री–गार्ड पाँच हजार रुप्या लेना व्यवस्था करल बा ।’

जनसहभागितामे वृक्षारोपण अभियानहे प्राथमिकता डेहल उपमहानगरपालिकासे फरछवार सडकबीचके मिडियन ओ फुटपाथके दाँयावाँयालगायतके सार्वजनिक ठाउँमे वृक्षारोपण करटी आइल बा । यी अभियानमे धनगढीबासीके साथे स्वदेश तथा विदेशममे रहल अन्य भूभागके नेपालीसेफे साथ डेले बटै ।