गुरही टिहुवारके अवसरमे कैलारी, धनगढी उपमहानगरपालिका ओ जानकीसे स्थानीय विदा

पहुरा समाचारदाता
धनगढी, १२ सावन । थारु समुदायसे मनाजैना गुरही टिहुवारके अवसरमे कैलारी गाउँपालिका, धनगढी उपमहानगरपालिका ओ जानकी गाउँपालिकासे सावन १३ गते स्थानीय विदा डेना निर्णय करले बटै ।

धनगढी उपमहानगरपालिकाके नगर प्रमुख गोपाल हमाल २०८१ ÷४÷३१ गतेक नगर कार्यपालिकाके निर्णय अनुसार थारु समुदायसे सावन शुक्ला पञ्चमी (नाग पञ्चमी)के दिन मनाजैना गुरही टिहुवारके अवसरमे एक दिन स्थानीय विदा डेना निर्णय हुइल जनैलै ।

ओस्टेक करके कैलारी गाउँपालिकाके अध्यक्ष राजसमझ चौधरी थारु समुदायसे मनाजैना गुरही टिहुवारके लाग एक दिन स्थानीय विदा डेना कार्यपालिकासे निर्णय करल जनैलै । ओस्टेक जानकी गाउँपालिकाफे एक दिन स्थानीय विदा डेले बा ।
मंगरके रोज एक दिन यी स्थानीय तह अन्र्तगतके सक्कु सरकारी कार्यालय, शिक्षण संस्था एवं संघसंस्थामे स्थानीय विदा रना जनागिल बा ।