अस्पताल सञ्चालनपाछे स्थानीय हर्षित

पहुरा समाचारदाता
धनगढी, १३ सावन । सक्कु स्थानीय तहमे एक अस्पताल अनिवार्यके नीति अनुसार पहिलचो कैलालीके बर्दगोरियामे १५ शैøयाके दोदोधरा अस्पताल सञ्चालनमे आइल बा । प्रधानमन्त्री केपी शर्मा ओली २०७७ अगहनमे ३९६ ठो पालिकामे अक्केसाथ अस्पताल निर्माण करक लाग शिलान्यास करल रहिट । उ मध्येके दोदोधरा अस्पताल सञ्चालनमे आइल बा ।

नेपालके ७५३ स्थानीय तहमे पहिलचो बर्दगोरिया गाउँपालिकासे अस्पताल सञ्चालनसँगे गुणस्तरीय स्वास्थ्य सेवा सुरु करल गाउँपालिकाके अध्यक्ष कर्णबहादुर कुँवर बटैलै । उहाँ अस्पतालके भौतिक निर्माणमे १८ करोड रुपियाँ खर्च हुइल ओ प्रयोगशालाके उपकरणलगायतके सामग्रीमे प्रदेश सरकारके सहयोगमे २५ करोडसम खर्च हुइल जानकारी डेलै ।

लग्गेहेक घोडाघोडी ओ लम्कीचुहा नगरपालिका, चुरे गाउँपालिका तथा मोहन्याल गाउँपालिकाके पूर्वी–दक्षिणी क्षेत्रके नागरिकहे स्वास्थ्य उपचार सेवा डेटी आइल बा । उ अस्पतालमे दुई जाने एमबिबिएस चिकित्सकसहितके व्यवस्था करल बा । २४ सै घण्टा आकस्मिक सेवा डेटी आइल दोदोधरा अस्पताल शल्यक्रिया सेवासमेत विस्तार कैना अध्यक्ष कुँवर बटैलै ।

अस्पतालमे ४८ जनहनके जनशक्ति रहल बा अस्पतालसे निःशुल्क पोस्टमार्टम सेवा सुरुसमेत करल बा । साथे सर्पदंश उपचार सेवा, सिकलसेल एनिमिया रोगके समेत उपचार हुइना करल बा ।

अस्पतालसे आँखी उपचार, निःशुल्क रगत, स्वास्थ्य बिमाके कार्यक्रम, शववाहन, घरसे घाटसम महाप्रस्थान, मृत्यु हुइलपाछे हरेक नागरिकहे १० हजार किरियाखर्चसमेत डेना करल गाउँपालिकाके उपाध्यक्ष गणेशराज गिरी बटैलै । गाउँपालिकाके आगामी योजना सेवा विस्तार कैके १५ से ५० शय्याके अस्पताल डायलासिस, पित्तथैली, पत्थरी, एपेन्डिक्स जैसिन अपरेसन ओ आइसियुसमेत सञ्चालनमे लन्ना तयारीमे रहल जनाइल बा ।

गाउँमे सस्तो सुलभ ओ गुणस्तरीय स्वास्थ्य सेवा पाइलपाछे स्थानीयमे खुसी छाइल बा । उपचारमे आइल नरेश विक घरअंगनामे आवश्यक सम्पूर्ण स्वास्थ्य उपचार पाके खुसी हुइल बटैलै । उहाँ न्यून आयस्रोत हुइल आपन जैसिनहे बाहर जाके उपचार करे नैसेकजैना बटैटी सस्तोमे उपचार पाइबर सहज हुइल बटैलै । औरे स्थानीय श्यामलाल चौधरीे घरमे सर्वसुलभ उपचार पाइल बटैलै । स्वास्थ्य क्षेत्रमे गाउँपालिकासे मजा काम करल उहाँके कहाइ रहल बा ।

सुदूरपश्चिम प्रदेशमे एकसाथ शिलान्यास करल ५३ आधारभूत अस्पतालमध्ये अधिकांश अलपत्र अवस्थामे रहल बेला कैलालीके बर्दगोरिया भर घरमे सुविधासहित गुणस्तरीय स्वास्थ्य सेवा प्रदान कैटी आइल बा । औरे ठाउँमे भर जग्गा प्राप्तिमे ढिलाइ, ठेकेदारके लापर्बाही, बजेट अभावलगायत टमान कारणसे अस्पताल निर्माणमे सन्तोषजनक प्रगति हुइ नैसेकल जनप्रतिनिधि बटैले बटै ।

आधारभूत अस्पतालके शिलान्यासके पाँच बरससे ढेर समय बिट्लेसे फेन अधिकांश अस्पताल निर्माण हुइ सेकल नैहो । कुछ पालिकासे टे जग्गासमेत व्यवस्था करे सेकल नैहो । कुछ पालिकामे भवन बन्लेसे फेन अस्पताल सञ्चालन हुइ सेकल नैहो ।