थारु समुदाय गुरही मनैलैं
धनगढीके गुरही चोकमे गुरहीके मुर्ति अनावरण
पहुरा समाचारदाता
धनगढी, १३ सावन । थारु समुदायसे मंगरके रोज गुरही टिहुवार मनैले बटै । गुरही अस्रैलेसे गाउँघरमे रहल रोगव्याधी सब नास हुइठं ओ गाउँहे रोगव्याधि ओ दुःखसे छुटकारा मिलठ् कना जनविश्वासके साथ गुरही टिहुवार मनाइल हो ।
गुरही टिहुवार प्रत्येक गाउँ गाउँमे आ अपन तरिकासे मनाइल बा कलेसे सुदूरपश्चिम प्रदेशके अस्थायी राजधानीस्थित धनगढी उपमहानगरपालिका वडा नम्बर ८ गुरही चोकमे भव्य कार्यक्रमके विच गुरही मनाइल बा । कलेसे यी साल स्थापना कैगिल गुरहीके मुर्ति सुदूरपश्चिम प्रदेश सरकारके सामाजिक विकास मन्त्री मेघराज खडका अनावरण करले बटै ।
उहे अवसरमे सम्बोधान करटी मन्त्री खडका जातीय भेषभुसा, विविधताहे बचैना कलेक एकात्मक शासन प्रणालीसे नाही संघात्मक शासन प्रणालीसे ओ एकतन्त्रिण व्यवस्थासे नाही लोकतान्त्रिणक व्यवस्था रहल बटैलै ।
मन्त्री खडका कहलै, संस्कृति ओ प्रकृतिके सम्मान सक्कु जाने कैना जरुरी बा । थारु समुदायमे रहल गुरही टिहुवार एकता, मेलमिलाप बह्रले बा । एकता मेलमिलापसे केल्ह समाजके विकास हुई ।
सुदूरपश्चिम प्रदेश सरकारसे थारु समुदायके बरघर भल्मन्सा प्रथाहे कानूनी प्रक्रिया डेना अन्तिम चरणमे पुगाइल मन्त्री खडका कहलै । मुख्यमन्त्री अगुवाई सामाजिक विकास मन्त्रालयसे बरघर भल्मन्सा ऐन प्रदेशसभा पेश करल उहाँ बटैलै ।
धनगढी उपमहानगरपालिकाके नगर उपप्रमुख कन्दकला कुमारी राना गुरही मुर्ति स्थापनाके संरक्षण कैना सक्कु जानेक दायित्व रहल बटैली ।
पहिले गाउँघरमे मनैना गुरही अब्बे सिंहदरबारसम छिरल बा । काल्हके दिन गुरही धनगढी उपमहानगरपालिकामे डिजिटल बन्ही उहाँ कहली, यी चोकके नक्साङकन हुई । कोई गुगलमे सर्च करके हेरी टे गुरही चोक कहिके भेटाई सेक्ही । एक चो ठो लोकेशन बनल बा ।
धनगढी उपमहानगरपालिका २०७९ सालमे स्थानीय विदा ओ गुरही टिहुवार मनाइक लाग सहयोग करलफे उहाँ बटैली । गुरहीके मुर्ति स्थापना करेक लाग धनगढी उपमहानगरपालिका, प्रदेश सरकार ओ वडा नम्बर ८ के कार्यालयसे सहयोग करल उहाँ बटैली ।
ओस्टेक करके थारु समुदायके यूवा कुलटमे फस्टी गैल ओरसे सक्कु जाने आपन लर्कनहे ध्यान डेना जरुरी रहल बटैली ।
थारु कल्याणकरिणी सभाके केन्द्रीय उपाध्यक्ष प्रभातकुमार चौधरी थारु समुदायके प्रकृतिके पुजक रहल ओरसे संस्कृति ओ प्रकृति सम्मान स्वरुप परम्परागतसे यी टिहुवार मनैटी आइल बटैलै । उहाँ कहलै, गुरही टिहुवारके आपन महत्व रहल बा । यिहीहे बुझलेसे टिहुवार मनैलेसे पुजा करलेसे रोगव्याधि ओ दुःखसे छुटकारा मिलठ् कना जनविश्वास बा ।
कार्यक्रममे थारु महिला सभाके जिल्ला अध्यक्ष दुर्गा कुश्मी, थारु बुद्धिजीवी ठाकुर प्रसाद करिया प्रधानलगागत मन्तव्य राखल रहिट । संखी संजाल कैलालीके अध्यक्ष उन्नती चौधरीके अध्यक्षतामे हुइल कार्यक्रममे थारु बुद्धिजीवी इन्दु थारु गुरहीके विशेषताबारे जानकारी डेहल रहिट ।
कार्यक्रमके संचालन सानु चौधरी ओ अनिल कुश्मी करल रहिट । ओस्टेक सांस्कृतिक कार्यक्रमके संचालन राज चौधरी ओ सु्निता चौधरी करल रहिट । कार्यक्रममे गुरहीके मुर्ति स्थापन कैना सहयोग करल कहटी निबर्तमान उद्योग, पर्यटन, वन तथा बातावरण मन्त्री लक्ष्मण जोगेठवालगायत टमान जनहनहे सम्मान कैगिल बा । कार्यक्रम थारु समुदायके संस्कृति झल्कना टमान मेरिक नाँच डेखागैल रहे ।
