महिलनहे आर्थिक शसक्तीकरण बनैना जरुरी बाः नगर उपप्रमुख कन्दकला

पहुरा समाचारदाता
धनगढी, १४ सावन । उद्यम व्यवसाय संचालन करटी रहल कैलालीके तीन पालिकाके महिला उद्यमीहुकनहे पाँच दिने उद्यमशिलता तथा सीप विकास तालिम डेगिल बा ।

महिला पुनस्र्थापना केन्द्र (ओरेक) नेपालके आयोजनामे कैलाली जिल्लाके धनगढी उपमहानगरपालिका, गौरीगंगा नगरपालिका ओ भजनी नगरपालिकाके महिला कृषक समु्ह, हिंसा प्रभावित २९ जाने उद्यमीहुकनहे उद्यमशिलता तथा सीप विकास तालिम डेगिल हो ।

बुधके रोज धनगढीमे हुइल तालिम समापन कार्यक्रमके प्रमुख अतिथि रहल धनगढी उपमहानगरपालिकाके नगर उपप्रमुख कन्दकलाकुमारी राना महिलाहुकनहे आब आर्थिक सशक्तीकरणसे जोरे पर्ना अब्बेक अवश्यकता रहल बटैली ।
पहिले महिलाहुक्रे घरेक काममे सिमित रहिट मने आजकाल्ह उद्यमीके रुपमे आघे बह्रटी बटै, उपप्रमुख राना कहली, करलेसे जाफे सफल हुइठ । करुइयाके इच्छा भर हुई परल ।

उहाँ आपन अनुभव सुनैटी पहिले तालिम लेहल, टमान कार्यक्रममे सहभागी हुइल अब्बे उहे तालिम ओ कार्यक्रममे सिखल चिज काम लागल बटैठी । अभिनफे आर्गनिक टिना खेती व्यवसाय संचालन करल ओ उहीसेफे आम्दानी हुइल उहाँ बटैठी । यहाँ किसान मेहनत करके उब्जनी कैना विचौलिया मालामाल हुइटी गैल ओरसे धनगढी उपमहानगरपालिकासे किसान कार्डके व्यवस्था करल उहाँ बटैठी ।

धनगढी उपमहानगरपालिकासे गैल बरस सीप तथा रोजगार मेला संचालन करके ८ क्षेत्रके २९ विधामे १ हजार ८ जनहनहे तालिम संचालन करल ओ ओम्ने तालिम लेहुइया बहुट जाने अपने उद्यम संचालन करल नगर उपप्रमुख राना बटैली ।
दहित टेलरफे तालिममे सहभागी हुइल अब्बे सांस्कृतिक पोशाकके शिल्के मानग्य आम्दानी करल उहाँ बटैली । खाजाके परिकारसे शनिवारिय मेलामे मगर, नेवार, रानाथारु, थारु समुदायके महिला उद्यमी आम्दानी कैना सफल हुइल ओरसे और महिलाहुकनहे कार्ड बनैना उहाँ आग्रह करली ।

धनगढीमे फोहोर व्यवस्थापनसे धनगढी सफासुग्घर हुइल ओ ओकर संगे और जाने रोजगारी पाइल उहाँ बटैली । धनगढीमे फुला व्यवसायसे मजा आम्दानी करल ओ यहाँ और पालिकासे ल्यानके फुला विक्री करुइयाके लाग मापदण्ड बनैना उहाँ बटैली ।

कृषि ज्ञान केन्द्र कैलालीके निमित्त प्रमुख टेकबहादुर विष्ट कृषि ज्ञान केन्द्रसे टरेक स्तरके ३० जाने कृषकहुकनहे सम्मान कैना बटैलै । उहाँ कहलै, जौन कृषक अपनही उत्पादन करके घर घर विक्री करठ ओइनहे एक÷एक ठो साइकल, तराजु, दु्ई ठो क्रेट डेना ओ ओम्ने पाँच ठो आर्गनिकयुक्त टिना, विषादीमुृक्त टिना खाई लगायत सन्देश रना उहाँ बटैलै । छोट किसानके लाग करौडौ सहयोग करटी आइल उहाँ बटैलै ।

जिल्ला भेटनरी कार्यालयके प्रमुख विनोद कठायत अपन कार्यालयसे एकल महिला, दलित ओ जनजाती महिलाहुकनके लाग यी बरस ३७ लाख बजेट विनियोजन करल बटैलै । अब्बे कृषि पेशामे महिलाहुकनके सहभागी बह्रटी गैल ओरसे करके दायरामे रहल महिला उद्यमीहुकनहे सहयोग कैना उहाँ बटैलै ।

कैलाली उद्योग वाणिज्य संघके सदस्य कृष्णा विष्ट संघसे कोशेली घर संचालनमे ल्यानल ओ उहाँ महिला उद्यमीहुकनसे तयार पारल सामाग्री बजारीकरणमे सहयोग पुग्ना बटैली । कोइ व्यवसाय सुरु करे जाइटा कलेसे हेल्क डेस्कसे परामर्श डेटीरहलफे बटैली ।

ओेरेक नेपालके सचिव संगीता अधिकारी जेकर लाग तालिम संचालन करल हो ओइने उत्सुक हुईपर्ना कहटी छोट हुइलेसेफे उद्यम व्यवसाय कैना जरुरी रहल बटैली ।

महिलाहुक्रे आर्थिक रुपमे बल्गर हुइलेसे लैङिक हिंसामे कमी अइना उहाँ बटैली । एक व्यक्ति टमान ठाउँमे हात डर्नासेफे एक ठो व्यवसाय संचालन कैटी गैलेसे सफल हुइना बटैली । ओरेक नेपालके ठे व्यवसाय करुइयाके लाग विउ पुँजीके व्यवस्था करल ओरसे यदि कोई उद्यमी आइलेसे सहयोग कैना बटैली ।

तालिममे सहभागी पार्वती चौधरी तालिमसे व्यवसाय संचालन कैना, ग्राहक बनैना, व्यवयायके लेखाजोख, हरहिसाब रख्ना, मुल्याङकन कैना, नविकरण कैनालगायत टमान चिज सिखके व्यवसायमे सहजता प्रदान ह्ुइना बटैली । तालिममे सहजीकरण सुनिल पोख्रेल, धनगढी उपमहानगरपालिकाके उद्यम विकास सहजकर्ता कल्पना भण्डारी करल रहिट ।

तालिममे ओरेक नेपालके प्रदेश संयोजक सपना थापा, जिल्ला संयोजक गीता चौधरीलगायतके सहभागिता रहल रहे । तालिम समापन कार्यक्रमके संचालन ओरेक नेपालके कृषि प्राविधिक मिना कुवँर करल रहिट ।