दलित महिला ओ सीमान्तकृत समुदायके मानवअधिकारके सवालमे संचारकर्मीनसे छलफल
पहुुरा समाचारदाता
धनगढी, १४ सावन । दलित महिला ओ सीमान्तकृत समुदायके मानवअधिकारके सवाल तथा विकासके मूलप्रवाहीकरणमे ल्यन्ना संचारकर्मीनके भूमिका विषयमे छलफल कैगिल बा ।
दलित महिला संघ (फेदो) कैलालीसे ‘नेपालमा दलित महिला र किशोरीको मानवअधिकार प्रवद्र्धन परियोजना’ अन्र्तगत बुधके रोज धनगढीमे दलित महिला ओ सीमान्तकृत समुदायके मानवअधिकारके सवाल तथा विकासके मूलप्रवाहीकरणमे ल्यन्ना संचारकर्मीनके भूमिका विषयमे छलफल कैगिल हो । कार्यक्रममे राष्ट्रिय मानव अधिकारके नन्दिरा श्रेष्ठ दलित महिला ओ सीमान्तकृत समुदायके मानवअधिकारके सवालमे प्रस्तुतीकरण करल रहिट ।
कार्यक्रममे फेदो कार्यक्रम संयोजक विनोद घिमिरे दलित शसक्तीकरण ऐन प्रमाणीकरण हुइलपाछे कार्यक्रमके लाग बजेट विनियोजन नैहुइलपाछे ओकर लाग फेदोसे दवावमूलक कार्यक्रम करल बटैलै । प्रदेश सरकारसे यिहे चालु आर्थिक बर्षके बजेट विनियोजन करल उहाँ बटैलै ।
दलित महिला ओ सीमान्तकृत समुदाय अभिनफे सामाजिक लगायत टमान विभेदके सामाना करेपर्ना अवस्था रहलफे उहाँ बटैलै । कैलाली लगायत टमान ठाउँमे महिला उप्पर हिंसा हुइटी रहल ओरसे स्थानीय तहमे लैङिक हिंसा निवारण कोष संचालन करेसेक्लेसे लैङिक हिंसामे परल महिलाहुकनके न्यायके ढोकासम पुग्ना सहजुल हुई सेक्ना बटैलै ।
कैलालीमे ढेर महिला उप्पर हिंसा हुइना ओरसे धनगढीमे रहल महिला सेफ हाउस धाने नैसेक्ना ओरसे और ठाउँमे महिला सेफ हाउस संचालन कैना उहाँ आग्रह करलेै ।
कञ्चनपुरके कृष्णपुर नगरपालिकामे छाउगोठ भत्कैना अभियान जारी रहल कहटी मानसिकता परिवर्तन कैना जरुरी रहल उहाँ आग्रह करलै । अन्तरजातीय विवाह अभिनसम और समुदायसे स्वीकरे नैसेकल कारण टमान बाहनामे मुद्दामे लगैना कार्य हुइटी रहल कार्यक्रम संयोजक घिमिरे बटैलै ।
फेदोके अध्यक्ष सविना सुनारके अध्यक्षतामे हुइल कार्यक्रममे उहाँ अभिनफे दलित ओ सीमान्तकृत समुदाय उप्पर विभेद हुइटी रहल बटैली ।
