सुदूरपश्चिमके मुख्यमन्त्री शाह विश्वासके मत पैलै
पहुरा समाचारदाता
धनगढी, १५ सावन । सुदूरपश्चिम प्रदेशके मुख्यमन्त्री कमल बहादुर शाह विफेक रोज विश्वासके मत लेले बटै ।
मुख्यमन्त्री शाह सत्ता पक्षके २९ ओ एक जाने नागरिक उन्मुक्ती पार्टी करके जम्मा ३० मत पैले बटै कलेसे उहाँक विपक्षमे १५ मत परल बा । प्रदेश सभामे कांग्रेसके १८, नेकपा एमालेके ११, नेकपा माओवादी केन्द्रके सभामुखसहित ११, नाउपाके ७, समाजवादीके ३, राप्रपा १ ओ स्वतन्त्र १ जाने सदस्य बटै ।
आर्थिक अनियमिततामे मुछलपाछे असार १९ गते मुख्यमन्त्री शाहसे नागरिक उन्मुक्ति पार्टी (नाउपा)के ओरसे उद्योग, पर्यटन, वन तथा वातावरण मन्त्री रामेश्वर चौधरीहे बर्खास्त करल रहिट । उ पाछे नाउपासे उहाँहे डेहल समर्थन फिर्ता लेहल रहे । ५३ सदस्यीय प्रदेश सभामे अब्बे ५२ सदस्य बटै ।
नेकपा एकीकृत समाजवादीके संसदीय दलके नेता दीर्घ बहादुर सोडारी भ्रष्टाचारके मुद्दा लागलपाछे निलम्बनमे बटै कलेसे बाँकी रहल ५१ सदस्य मध्ये विश्वासके मतके लाग २७ जाने प्रदेश सभा सदस्यके आवश्यक परठ ।
