फोहोरमैला व्यवस्थापनसे चिटिक्क बन्टी धनगढी

पहुरा समाचारदाता
धनगढी, १६ सावन । फोहोरमैला व्यवस्थापनसे प्रमुख व्यापारिक केन्द्र धनगढी सहर चिटिक्क बन्टी गैल बा ।

प्लाष्टिकके प्रयोग निषेधित धनगढी नियमित सरसफाई ओ उपयुक्त रुपमे फोहोरमैला व्यवस्थापनके कारण चिटिक्क बनल हो । धनगढीके छ लेन सडक, मुख्य बजार सडकसे अन्य सहायक सडक सफा, सुग्घर हुइल बटै । सडकके मिडियनमे करल वृक्षारोपणसे सडक क्षेत्र हराभरा हुइटी रहल बटै । वहाँ फुलल फूलासे जिहीहेफे मन्त्रमुग्ध बनैटी रहल बा । सहरी क्षेत्रसे निकरल फोहोरमैला बिक्री करके धनगढी उपमहानगरपालिकासे आर्थिक आयआर्जनसमेत करटी रहल बा ।

पहिले जेहोर टेहोर फोहोर ह्ुइल धनगढीसे सरफाइमे बहुट फड्को मारल धनगढी उपमहानगरपालिका–२ के हरिकृष्ण भट्ट बटैलै । “विगतमे धनगढीके सडक किनारमे फोहोरके डङ्गुर हुए । दुर्गन्ध आए”, उहाँ कहलै,“अब्बे धनगढी सफा, सुग्घर हुइल बा । सडकमे प्लाष्टिक, कागजके टुक्राफे नैविल्गाइठ ।”

छ लेन सडकमे ब्रुमर ओ रोड वासरसे नियमित सरसफाइ कैना करल धनगढी उपमहानगरपालिका जानकारी डेले बा । मेसिनसे सरसफाई करे नैमिलल सडकमे मनैनसे सरसफाईके काम हुइटी रहल जनाइल बा । ओस्टेक करके, नगर प्रहरीसे नियमित रुपमे अनुगमनके साथे सरसफाइ सम्बन्धी नागरिकहे सचेत पर्ना कार्य करटी रहल वातावरण तथा खानेपानी सरसफाई शाखा प्रमुख अशोक अवस्थी जानकारी डेलै । उहाँ धनगढी प्रवेश कैना यात्रुहुकनहे जथाभावी फोहोर नैफेकिट कहिके लागल नगर प्रहरीसे टमान नाकामे दैनिक सचेत पर्ना कार्य करटी आइल बटैलै ।

धनगढी उपमहानगरपालिकाके १ से १३ समके वडामे सबसे ढेर जनसङ्ख्या रहल बा । यी वडासे केल्ह दैनिक ४३ टन फोहोर उत्पादन हुइना करल जनाइल बा । जेन्से हरेक दिन २१ टन फोहोर सङ्कलन करके उहीहे व्यवस्थापन कैना काम करटी रहल जनाइल बा । सङ्कलन करल ७० प्रतिशत फोहोरमैलाहे विक्री वितरण करटी रहल अवस्थी जानकारी डेलै । “३० प्रतिशत फोहोरमैलासे केल्ह काम नैलग्ना डेखल बा”, उहाँ कहलै,“यिहीहेफे ढेरमे १० प्रतिशतमे झर्ना हमार लक्ष्य बा ।”

धनगढी उपमहानगरपालिकामे सार्वजनिक स्थलमे फोहोर कैना बन्देज करल बा । ओसिक फोहोर करुइयाहे फोहोरमैला व्यवस्थापन ऐन, २०७४ अनुसार जरिवाना कैना कार्य हुइटी रहल बा । सार्वजनिक स्थलमे फोहोर करुइयाहे पहिल बार पाँच हजार, दुसरा बार करलेसे १० हजार ओ टिसरा बार फोहोर करलेसे १५ हजार रुप्यासम जरिवाना कैना करल जनाइल बा ।

रोडमे नेंग्ना बटुवाहुक्रे अपनठेन रहल फोहोर फेकक लाग मेन बजार रोड, छ लेन सडकमे सरना नैसरना फोहोर धारे मिल्ना निला ओ हरियार रङ्गके डस्टविन धारल बा । यी डस्टविन बटुवासे प्रयोग करेक लाग ढरलेसेफे नगरवासीसे घरके मिश्रित फोहोर ल्यानके डस्टविनमे ढारडेना करल कार्यसे समस्या हुइटी रहल अवस्थी बटैलै ।

”उ डस्टविन बटुवा वा बाहेरसे आइल व्यक्तिसे फोहोर फेकक लाग ढाल हो”, उहाँ कहलै, “ओम्ने घरेक फोहोर नैमिलैना मै नगरवासीहे आग्रह करटु ।”