चक्कु प्रहार कैके युवतीके हत्या

पहुरा समाचारदाता
धनगढी, १७ सावन । कैलालीमे सेकुवा सेन्टरमे कार्यरत एक युवतीके चक्कु प्रहार कैके हत्या करल बा । कैलालीके बर्दगोरिया गाउँपालिका–१ मे रहल राजधानी सेकुवा एन्ड मःमः सेन्टरमे कार्यरत बर्दगोरिया गाउँपालिका–३ के १७ वर्षीया याचना सेजवालके चक्कु प्रहार कैके हत्या हुइल प्रहरी जनैले बा ।

जिल्ला प्रहरी कार्यालयके प्रवक्ता प्रहरी नायब उपरीक्षक (डीएसपी) राजकुमार सिंह शनिच्चरके सकारे करिब १० बजे ओर सेजवालउपर उहे सेकुवा एन्ड मःमः सेन्टरमे काम करुइया बर्दगोरिया–१ के ३३ वर्षीय नृप साउद चक्कु प्रहार करल बटैलै ।

चक्कु प्रहारसे गम्भीर घाहिल हुइल सेजवालहे उपचारके लाग धनगढीके निसर्ग हस्पिटल लालन रहे । उपचारके क्रममे उहाँके मृत्यु हुइल हो । चक्कु प्रहार करुइया साउदहे प्रहरी नियन्त्रणमे लेले बावै । घटनाबारे अनुसन्धान हुइटी रहल प्रहरी जनैले बावै ।