कैलारीके के गाउँमे अट्वारी ओ तीजके अवसरमे ‘ फुटबल प्रतियोगिता हुइना
पहुरा समाचारदाता
धनगढी, १७ सावन । कैलालीके कैलारी गाउँपालिका ४ के गाउँस्थित खेलमैदानमे २६ औं निसर्ग फुटबल पुरुष तथा महिला प्रतियोगिता २०८२ हुइना बा ।
न्यु युवा सुन्दर शक्ति क्लवके आयोजनामे थारु समुदायके मौलिक पर्व अट्वारी ओ हिन्दु नारीहुकनके महान पर्व तीजके अवसरमे प्रतियोगिता हुइना हुइल हो ।
आयोजक क्लवसे शनिच्चरके रोज पत्रकार सम्मेलन करटी प्रतियोगिताबारे जानकारी कराइल हो । क्लवके अध्यक्ष बृक्षलाल चौधरीके अनुसार भदौ १ गतेसे १२ गतेसम सञ्चालन हुइना प्रतियोगितामे १६ ठो पुरुष टीम ओ ८ ठो महिला टीमके सहभागिता रना जनैलै ।
प्रतियोगिताके विजेताहे पुरुषओर नगद एक लाख प्रदान कैना बा कलेसे उपविजेताहे ५० हजार प्रदान कैना आयोजक क्लव जनैले बा । ओस्टेक करके महिलाओरके विजेताहे २५ हजार ओ उपविजेता टीमहे १५ हजार प्रदान कैना क्लवके अध्यक्ष बृक्षलाल बटैलै ।
प्रतियोगितामे इन्ट्री शुल्क पुरुष टीमहे ६ हजार ५ सय ओ महिला टीमहे २ हजार ५ सय कायम करल बा ।
यिहे बीच कैलारी गाउँपालिका ४ के वडाध्यक्ष ठागुराम चौधरी खेलकुदमार्फत व्यक्तिसे अपन व्यक्तित्व विकास करेसेक्ना बटैलै । खेलकुदमार्फत अपनहे चिन्हैनाके साथै शरीरिक स्वास्थ्यके लाग खेलकुद महत्वपूर्ण रहल उहाँक कहाई बा ।
उहाँ कहलै, गाउँघरमे रहल यूवाहुकनमेफे ढेर बा । प्रतियोगिता हुइलपाछे यूवाहुक्रे आपन उप्पर नुकल प्रतिभा डेखैना अवसर पैठै । खेलकुडसे युवाहुक्रे आपनहे दक्ष बनाइल बा । प्रतियोगिता नैहुइठ कलेसे कुशल खेलाडी राष्ट्रिय स्तरमे जैना असम्भव रहठ ।
कार्यक्रममे जिल्ला फुटवल संघके सदस्य मनिराम चौधरी खेलकुदसे अनुसशानमे टेवा पुगाइल बटैलै । उहाँ कहलै, हमार गाउँघर मजा खेलाडी बटै मने अवसर नैपाइल हुइट । यी क्लवके आयोजनामे हुइल प्रतियोगितासे वडा नम्बर ४ के लउण्डीफे राष्ट्रिय स्तरमे जैना सफल हुइल बटै ।
कार्यक्रममे कैलारी गाउँपालिकाके कार्यपालिका सदस्य लालबहादुर बिक, क्लबके खेलकुद संयोजक देवनारायण चौधरी, गाउँक भलमन्सा जगलाल चौधरी खेलकुदसँगे समाज विकासके लाग युवा अग्रसर हुके लागेपर्नामे जोड डेहल रहिट ।
युवाहुकनहे कुलतसे बचैनाफे खेलकुदके महत्वपूर्ण भूमिका रनासमेत चर्चा करल ओइने गाउँस्तरसे राष्ट्रिय ओ अन्तराष्ट्रियस्तरके खेलाडी उत्पादन करे सेक्ना उल्लेख करलै ।
कार्यक्रमके संचालन टेकेन्द्र परियार करल रहिट । यूवाहुकनहे सक्रिय बनाइक लाग प्रत्येक बरस खेलुकुद प्रतियोगिता करटी आइल उहाँ बटैलै ।
