प्रदेश सरकारसे एक बर्षके कार्य प्रगती सार्वजनिक

पहुरा समाचारदाता
धनगढी, २० सावन । सुदूरपश्चिम प्रदेशके वर्तमान सरकारसे मंगरके रोज एक वर्षके कार्य प्रगती सार्वजनिकीकरण करले बा ।

सुदूरपश्चिम प्रदेश सरकारके मुख्यमन्त्री कमलबहादुर शाह अपन नेतृत्वके सरकार एक वर्षके अवधि राजनीतिक एवं शासकीय दृष्टिकोणसे सफल रहल बटैलै । यी अवधिमे प्रदेश सभाके विश्वास लेके राजनीतिक स्थायित्वके प्रत्याभूति करल ओरसे सरकार सञ्चालन एवं विकास गतिविधिहे तीव्रता डेहक लाग उपयुक्त ओ भरपर्दो आधार निर्माण हुइल बटैलै ।

प्रदेश सरकारके नीति कार्यक्रम ओ बजेट निर्माण एवं कार्यान्वयनमे वर्तमान सरकारसे राजनीतिक सहमति जुटाके साझा कार्यक्रमके रुपमे अपनत्व सिर्जना कैना सफल उहाँ बटैलै ।

सरकारसे कार्यान्वयनमे ल्यानल योजना तथा कार्यक्रमसे जनमानसमे सुशासन ओ विकासके नयाँ आशा, भरोसाके सञ्चार ह्ुइल मुख्यमन्त्री शाह बटैलै । विगतके योजना, विकास ओ प्रशासकीय कमीकमजोरी सुधार करके दिगो सुशासन ओ विकासके प्रत्याभूति डेहुवइनाओर निर्देशित हुके वर्तमान सरकार क्रियाशील रहल बा ।

कर्मचारीतन्त्रहे कार्यसम्पादनमे चुस्त, पारदर्शी ओ परिणाममुखी हुइना प्रेरित करल बा । प्रदेशके सार्वजनिक प्रशासन नैतिकवान सार्वजनिक व्यवहार प्रदर्शन करटी सक्कु समाजमे मूल्य मान्यता ओ सदाचार सुदृढ कैना दिशामे कृयाशील रहल बा ।
नीतिगत ओ प्रणालीगत सुधारके अतिरिक्त विकास निर्माणहे तिव्रता डेहल बा । यी अवधिमे सडक, सिंचाई ओ खानेपानी, भवन तथा जनताके आवास लगायतके पूर्वाधार ओ लडिया नियन्त्रण, पहिरो नियन्त्रण लगायतके संरक्षणात्मक कार्यमे उल्लेख्य प्रगती हुइल बा ।

कृषि क्षेत्रमे आधुनिक प्रविधिके प्रयोग ओ उत्पादकत्व अभिवृद्धि कैना खालके कार्यक्रम सञ्चालन हुइल बटै । शिक्षा, स्वास्थ्य लगायतके सामाजिक विकासके क्षेत्रमे महत्वपूर्ण उपलब्धी हासिल हुइल बा । प्रदेश सरकारसे समग्र शासकीय गुणस्तर एवं सुशासन अभिवृद्धिके क्रियाकलापमे जोड डेहल बा ।

मोर नेतृत्वके सरकारसे भ्रष्टाचार नियन्त्रणके सवालमे शून्य सहनशिलताके नीति अवलम्वन करटी आइल बा, मुख्यमन्त्री शाह कहलै “मै भ्रष्टाचार नैकरम ओ करेफे नैडेम, कना दृष्टिकोण अंगीकार करटी भ्रष्टाचार करल प्रमाण फेला परलेसे तत्काल कारवाही कैना कार्यपद्दती अवलम्बन करले बटु ।

प्रदेशसे सञ्चालन हुइना विकासके परियोजनामे उपभोक्ता समिति परिचालन नैकर्ना, छोट परियोजना स्थानीय तहमे हस्तान्तरण कैना लगायतके चार बुँदे प्रतिवद्धता समेत घोषणा करके परियोजना व्यवस्थापनमे पारदर्शिता ओ सुशासन कायम कैना प्रयत्न सुरु करल उहाँ बटैलै ।

तीनु तहके सरकार बीचके सुमधुर ओ कार्यमूलक अन्तरसम्बन्ध कायम कैना ओ स्थानीय तथा प्रदेश सरकारके शासकीय सुदृढीकरणके पहल हुइल बटै । प्रदेश सरकारसे स्थानीय तहमे हुइना वित्तीय हस्तान्तरणहे व्यवस्थित एवं बढोत्तरी करल बा । कुटनीतिक एवं विकास साझेदार निकायसँग समन्वय ओ परामर्शके कार्यहे आघे बढाइल बा ।

नेपालके सोह्रौं योजना तथा विकासके राष्ट्रिय लक्ष्यसँग सामञ्जस्यता कायम हुइना करके प्रदेशके आवधिक योजना, बार्षिक नीति तथा कार्यक्रम ओ बजेटसे तय हुइल विकासके लक्ष्य हासिल कैना सुदूरपश्चिम प्रदेश सरकार प्रतिवद्ध जनैले बा । चालु आर्थिक वर्षके नीति तथा कार्यक्रम ओ बजेटके कुशल कार्यान्वयसे जनताके आवश्यकता, चाहना, अपेक्षा ओ विश्वासहे साकार कैना प्रदेश सरकार सक्रिय रना जनैले बा ।

प्रदेश सरकारसे पछिल्का एक वर्षमे हासिल करल महत्वपूर्ण ३५ बुँदे उपलब्धी सार्वजनिक करले बा । एसियाली विकास बैंकसे सुदूरपश्चिम प्रदेशके एकीकृत आर्थिक तथा प्रर्यटन विकास सम्बन्धमे अध्ययन सम्पन्न करके प्रदेश सरकारहे प्रतिवेदन हस्तान्तरण करले बा ।

सुदूरपश्चिम प्रदेश सरकारसे कार्यान्वयमे ल्यानल साक्षर नेपाल अवधारणापत्रके उपलब्धी स्वरुप प्रदेशके १५ से ६० वर्ष उमेर समूहके साक्षर नागरिकके संख्या औषतमे ९५ प्रतिशत पुगल ओरसे सुदूरपश्चिम प्रदेशहे साक्षर प्रदेश घोषणा करल बा ।
सुदूरपश्चिम प्रदेश निजामती सेवा ऐन, २०७९ के संशोधन ओ नियमावली, २०८१ जारी करके प्रदेश निजामती सेवाहे व्यवस्थित करल बा । सुदूरपश्चिम प्रदेश स्थानीय सेवा (गठन तथा सञ्चालन) ऐन, २०८१ जारी हुके हाल नियमावली तर्जुमाके कार्य हुइटी रहल, प्रदेश सरकारसे यी वर्ष कानुन निर्माणओर १८ ठो ऐन नियम, निर्देशिका तथा कार्यविधि जारी करले बा ।

आर्थिक वर्ष २०८१÷०८२ मे प्रदेशके खर्च कैना क्षमतामे वृद्धि करटी ७०.२२ प्रतिशत वित्तीय प्रगति हासिल करले बा । जौन यी प्रदेश सरकारके अभिनसमके उच्च उपलब्धी हो ।

राष्ट्रिय प्राकृतिक स्रोत तथा वित्त आयोगसे करल टमान ११ ठो सूचकके आधारमे कार्यसम्पादन मूल्याङ्कनसे सक्कु प्रदेशमध्ये सबसे ढेर ५१.६ प्रतिशत अंक हासिल करके यी प्रदेश पहिल बनल बा । . चालू आर्थिक वर्षको वजेट तथा कार्यक्रम कार्यान्वयनमे सुधार करटी स्थानीय तहमे वित्तिय हस्तान्तरणके परिमाण बृद्धि करटी आर्थिक वर्षमे २०८०।८१ मे ८.०२% वित्तीय हस्तान्तरण हुइलमे आर्थिक वर्ष २०८११८२ मे ११.९८% पुगल बा ।

भौतिक पूर्वाधार विकासके क्षेत्रमे यी एक बर्षके अवधिमे प्रदेश सरकारसे १०६ कि.मि. कालोपत्रे, १०३ कि.मि. ग्राभेल ओ १४६ कि. मि. कच्ची सडक करके ३५५ कि.मि. सडक निर्माण सम्पन्न हुइल बा ।

सतही, भूमिगत ओ नयाँ प्रविधिमे आधारित सिंचाई प्रणालीसे १६२८ हेक्टर जमिनमे सिंचाई सुविधा ठप करल ओ मर्मत कार्यसे १३,९४७ हेक्टर जमिनके सिंचाई सुविधाहे पुनःस्थापना करल बा । बाढसे बस्ती तथा खेतीयोग्य भूमि जोगैना यी बर्ष २७ कि.मि. तटबन्ध निर्माण ओ २७ हेक्टर जग्गा लडिया उकाससे प्राप्त हुइल बा ।

खानेपानीके ८४१ इन्टेक जडान, ५१६ पोखरी निर्माण, २,१३३ कि.मि. पाइपलाईन जडान करके ११ हजार ९३९ निजी धारा जडान सम्पन्न हुइल बा । यी प्रदेश भिटर वि.सं. २०८२ असार मसान्तसम खानेपानी सुविधा ठप १ लाख ३ हजार ५२४ जनसंख्यामे विस्तार करल बा ।

अन्तराष्ट्रिय विकास संस्था (आइडिए) ओ नेपाल सरकार विच हुइल खानेपानी सुशासन तथा पूर्वाधार सहयोग आयोजना संचालन कैना सम्बन्धी सम्झौता अनुसार कैलालीके जानकी, बर्दगोरीया ओ जोशीपुर गाउँपालिके साथे डोटी जिल्लाके दिपायल सिलगढी नगरपालिकामे आयोजना सञ्चालन कैना करके नेपाल सरकार खानेपानी मन्त्रालय ओ सुदूरपश्चिम प्रदेश सरकारबीच लागत साझेदारीमे रु. १३ अर्व ३८ करोड ७० लाख रकम बरावरके आयोजना सञ्चालनके लाग समझदारीपत्रमे हस्ताक्षर हुके आयोजनाके काम सुरुवात करल बा ।

एक बर्षमे यी प्रदेशमे १४ हजार ७३२ सवारी साधन दर्ता हुके कूल २ लाख २१ ह्जार ४६४ पुगल ओ पछिल्का एक बर्षमे १८ हजार ५४५ नयाँ सवारी चालक अनुमति पत्र जारी ओ १९ हजार ३९९ सवारी चालक अनुमतिपत्र नवीकरण हुइल बटै ।
नेपाल सरकारसे स्विकृती प्राप्त करके अछामके बयलपाटा अस्पताल, कैलालीमे अवस्थित लम्कीचुहा अस्पताल ओ डडेलधुरामे अवस्थित जोगबुडा अस्पतालहे प्रादेशिक अस्पतालके रुपमे स्तरोन्नती ओ संचालन कैना प्रकृया आघे बह्राइल बा ।

कृषि क्षेत्रके उत्पादन ओ उत्पादकत्वहे टेवा पुगैना कृषि कर्जा अनुदान मार्फत १५१ जाने कृषकहे रु ९७ लाख ४९१ रकम उपलब्ध कराइल बा । यी कार्यक्रमसे प्रेरित हुके व्यावसायिक कृषकसे रु २३ करोड ४७ लाख ३२ हजार थप लगानी हुइल बा ।
भूमि व्यवस्था, कृषि तथा सहकारी मन्त्रालय मार्फत १ हजार ५४७ साना सिंचाई योजना सम्पन्न करके ३७८ हेक्टर जग्गामे ठप सिचाइ सुविधा पुगाइल बा । प्रविधि हस्तान्तरण ओर छोट भारी करके टमान ९८८ मेशिन तथा उपकरण कृषकहे वितरण करल बा ।

प्रदेशभिटर स्थापना हुइना करिव २८ ठो उद्योगके प्रारम्भिक वातावरणीय मुल्याङ्कन प्रतिवेदन स्वीकृत करल बा । १२२ हेक्टर जमिनमा वृक्षारोपण, १९ ठो वन समुदायमे हस्तान्तरण, ९ ठो सिमसार क्षेत्र संरक्षण, ३५ हेक्टर वनक्षेत्रमे जडिवुटीके खेती विस्तार, १६ लाख घनमिटर काठ उत्पादन करल बा ।

प्रदेश भिटर ३१ ठो स्थानमे धार्मिक मठ मन्दिर निर्माण, ९ ठो ताल ओ झरना संरक्षण, ९ ठो पर्यटकीय पार्क निर्माण करल बा । एक बर्षमे सुदूरपश्चिम प्रदेश भिटर १ हजार ९६४ नयाँ उद्योग दर्ता, ११० ठो उद्योगके लाग प्रविधि हस्तान्तरण, ९५६ जाने व्यक्तिहे सीप विकास तथा उद्यमशीलता विकास तालिम प्रदान करल बा ।

निःशुल्क रक्त संचार सेवा अन्तर्गत १,१८७ जाने बिरामीहे २,१४८ पिन्ट रगत निःशुल्क उपलब्ध, करिब १ लाख ४६ हजार ६१२ जाने किशोरीहे पाठेघरके मुखके क्यान्सर विरुद्ध एच पि भी खोप, एआई प्रविधिसे २२ हजार जानेक क्षयरोगके बिरामीके चेकजाँच परीक्षण, ११ हजारसे ढयार महिलाहे स्वास्थ्य शिविर मार्फत प्रजनन स्वास्थ्य सम्बन्धी सेवा प्रदान करल, १४ हजार नागरिकम निसर्ना रोगके स्क्रीनिंग कार्यक्रम सञ्चालन करल ओ ४,३९७ जाहनमे सिकलसेल एनिमिया व थालेसिमिया रोग परीक्षण करल जनैलै ।

मुख्यमन्त्री शाह प्रदेश सरकार प्रदेशके सम्रग विकास, आर्थिक एवं सामाजिक रुपान्तरण, नागरिकके आवश्यकता परिपूर्ति तथा अधिकारके संरक्षण, सुशासन अभिवृद्धि व सार्वजनिक सेवाक प्रभावकारिता वृद्धि कैना सम्बन्धम प्रतिवद्ध रना जनैलै ।
सुदूरपश्चिम प्रदेशम प्रचुर सम्भावना रलक प्राकृतिक स्रोत तथा साधन, पर्यटन, कृषि, खनिज लगायत सक्कु आर्थिक अवसरके अधिकतम उपयोग कैटी यी प्रदेशके जनताके आर्थिक समृद्धि ल्यन्ना अहोरात्र खटनाफे प्रतिवद्धता जनैलै ।