नाष्ट कलेज कक्षा १२ के उत्कृष्ट नतिजा
अनुमोदन समाचार
धनगढी, २० सावन । कैलालीके धनगढी उपमहानगरपालिका वडा नम्बर ४ उत्तरबेहडीस्थित नाष्ट कलेज कक्षा १२ ओरके परीक्षामे उत्कृष्ट नतिजा लन्ना सफल हुइल बा ।
विज्ञान ओ व्यवस्थापन पह्राई हुइना कलेजमे कक्षा १२ मे अध्ययनरत ६०१ विद्यार्थीमध्ये ४१६ जाने उत्तीर्ण होके ६९.२१ प्रतिशत नतिजा लानल हो । जेम्ने विज्ञान ओर २८६ विद्यार्थी ओ व्यवस्थापन ओर १३० जाने विद्यार्थी उत्तीर्ण हुइल कलेज जनैले बावै ।
कलेजमे विज्ञान विषय अध्ययनरत विद्यार्थी कपिल भण्डारी ३.९५ जिपीए लानके उत्कृष्ट नतिजा लन्ले बटंै । ओस्टके व्यवस्वस्थापन ओर उत्सव अग्रवाल ओ रोशनी रावल ३.८६ जिपीए लन्ले बटै । यी बरस कुल ४२ जाने विद्यार्थी ‘ए प्लस’ ग्रेड हासिल कैना सफल हुइल कलेज जनैले बा ।
‘उच्च अनुशासन तथा दक्ष व्यवस्थापन, उत्कृष्ट शैक्षिक वातावरण तथा गुणस्तरीय शिक्षा’ मूल नारा सहित वि.स. २०५७ सालमे स्थापना हुइल कलेज अब्बे विज्ञान व्यवस्थापन तथा प्रविधिके पठन पाठनसँगे सर्वाङ्गीण विकासके लाग गन्तब्य शिक्षालयके रुपमे चिन्हजाइठ् ।
कलेज विश्व विद्यालय अनुदान आयोग (यूजीसी)से निर्धारित संस्थागत गुणस्तरके टमान चरण पार कैटी राष्ट्रिय तथा अन्तर्राष्ट्रिय जगतमे सम्मान ओ उपलब्धिके सूचक गुणस्तर सुनिश्चितता तथा प्रत्यायन (क्यूएए) फेन प्राप्त कैटी पोखरा विश्व विद्यालयसे सम्बन्धन प्राप्त करले बा ।
नाष्टमे कक्षा ११ ओ १२ ओर विज्ञान ओ व्यवस्थापन, स्नातकतर्फ बीइ कम्प्युटर, बीसीए, बीबीए, बीइ सिभिल ओ स्नाकोत्तर ओर एमबीएसमके पह्राइ हुइटी आइल बा ।
