ऐश्वर्यके कक्षा १२ मे ५७.७७ प्रतिशत नतिजा
पहुरा समाचारदाता
धनगढी, २१ सावन । धनगढी उपमहानगरपालिका वडा न.५ हसनपुरमे रहल ऐश्वर्य विद्या निकेतनसे कक्षा १२ मे ५७.७७ प्रतिशत नतिजा ल्यन्ले बा ।
राष्ट्रिय परीक्षा बोर्डसे सोम्मार सार्वजनिक करल नतिजा अनुसार २०८१ के कक्षा १२ के वार्षिक परीक्षामे सहभागी ७४६ जाने विद्यार्थी मध्येमे ४३१ जने उत्तिर्ण हुइल विद्यालय प्रशासन जनैलै बा । उत्तिर्ण ४३१ विद्यार्थी मध्ये व्यवस्थापन संकायके निलेश शर्मा ओ रश्मी चन्द सर्वोत्कृष्ट नतिजा ल्यन्ना सफल हुइल बटै । ओइने दुनु जाने ३.९२ जिपिए प्राप्त करल बटै ।
ऐश्वर्य विद्या निकेतनमे विज्ञान संकायमे २२६ जाने विद्यार्थी परीक्षामे सहभागी हुइलमे १३८ जाने अर्थात ६१.०६ प्रतिशत उत्तिर्ण हुइल बटै । ओस्टे व्यवस्थापन संकायमे ४८२ जाने विद्यार्थी सहभागी हुइलमे २६३ अर्थात ५४.६६ प्रतिशत ओ मानविकी ओ शिक्षा संकायमे ३८ जाने सहभागी हुइलमे ३० जाने अर्थात ७८.९६ प्रतिशत विद्यार्थी उत्तीर्ण हुइल विद्यालय प्रशासन जनैले बा ।
विद्यालय प्रशासनसे डेहल जानकारी अनुसार २५ जाने विद्यार्थीहुक्रे सर्वोत्कृष्ट नतिजा अर्थात ए प्लस ल्यानल बटै । ओस्टेक ९३ जाने ए , १७५ जाने बी प्लस,१३२ जाने बी ओ ६ जाने सी ग्रेड ल्यानल बटै । ऐश्वर्य विद्या निकेतनमे शैशिक सत्र २०८२ मे कक्षा ११ मे ७०० से ढेर विद्यार्थी भर्ना हुइल बटै कलेसे हाल कक्षा १२ मे अध्ययनरत विद्यार्थी संख्या ७६६ जाने बटै ।
