कैलारीमे ६ ठाउँसे स्तनपान कक्षसे सेवा प्रदान
पहुरा समाचारदाता
धनगढी, २२ सावन । कैलाली जिल्लाके कैलारी गाउँपालिकासे ६ ठाउँमे स्तनपान कक्ष स्थापना करके सेवा प्रदान करटी आइल बा ।
कैलारी गाउँपालिकाके वडा नम्बर २, ४, ५, ६, ७ ओ ८ मे स्तनपान कक्ष स्थापना करके सेवा प्रदान करटी आइल कैलारी गाउँपालिका महिला तथा बालकालिका शाखाके प्रमुख बालकुमारी चौधरी बटैली ।
स्तनपान कक्ष स्थापना हुइलपाछे छोट लर्का लेके वडा कार्यालय, स्वास्थ्य संस्थामे सेवा लेहे आइल सेवाग्राहीहुकनहे सहजुल हुइल उहाँ बटैली ।
उहाँ कहली, ‘स्तनपान कक्षमे लरकोवा डाईहे सुटके दुध खवैना वेडके व्यवस्था, लर्कनके टमान मेरिक खेलौना व्यवस्था करल बा । उ कक्षमे बैठके दुध खवैलेसे पिफम, चकटीके व्यवस्था, लर्कनके लाग बल्हके व्यवस्थाफे करल बा ।
लर्का लेके सेवा लेहे आइल महिलाहुकनहे दुध खवैना कर्रा रहे, उहाँ कहली, अब्बे स्तनपान कक्ष स्थापना हुइलपाछे सेवा लेना ओ दुध खवैना सहजुल हुइल बा । लकोरयाहुकनसंग और छोट बच्चा अइलेसे स्तनपान कक्षमे रमैना करल बटै ।
कैलारी गाउँपालिकामे औरे बरस ४ ठाउँमे केल्ह स्तनपान कक्षके रहे । गैल आर्थिक बर्ष २ ठाउँमे स्तनपान कक्ष स्थापना करलपाछे अब्बे जम्मा ६ ठाउँसे सेवा प्रदान करल कैलारी गाउँपालिका महिला तथा बालकालिका शाखाके प्रमुख बालकुमारी बटैली ।
कैलारी गाउँपालिका स्वास्थ्य शाखाके सिअनमी अनिता चौधरी सावन १६ गतेसे २२ गतेसम नौ वडामे स्तनपान सप्ताह मनाइल बटैली । उहाँ कहली, यी अवधिमे आमा समुह, स्वास्थ्य संस्थामे स्तनपान सम्बन्धी जनचेतनामुलक कार्यक्रम कैगिल बा । छोट लर्कनहे स्तनपान करैना तरिका, स्तनपानके फाइदा, स्तनपान करैना आसन ओ बोटलके दुध खवैलेसे हुइना वेफाइदाबारे जानकारी डेहल बा ।
लर्का जलमल १ घण्टाभिटरे दुध खवाईपर्ना, ६ महिनासम डाईक दुध केल्ह खवैना ओ करिब २ बरस अनिवार्य डाइक दुध खवाईपर्ना लगायत जानकारी डेहल सिअनमी अनिता बटैली ।
हरेक वर्ष जस्टे के अगस्ट १ से ७ तारिखसम विश्व स्तनपान सप्ताह मनै यी बरस मनाइजाइठ । उ सप्ताहके उद्देश्य डाइक दूधके महत्वबारे जनचेतना फैलैना, स्तनपानसम्बन्धी मिथ्या धारणा हटैना ओ डाई तथा भर्खरके बच्चाके स्वास्थ्य प्रवद्र्धन कैना हो ।
यी वर्ष विश्व स्तनपान सप्ताहके नारा, ‘स्तनपानहे प्राथमिकता दिः सहयोगी बातावारण निर्माण करी ’ कना मुल नाराके साथे पहिल छ महिनामे पूर्ण स्तनपानहे बढावा डेना ओ डाइक लाग सुरक्षित सहयोगी वातावरण बनैना जोड डेहल बा ।
स्तनपानके फाइदा का बा टे ?
पूर्ण पोषणः स्तनपान शिशुके लाग पहिल ६ महिनासम पूर्ण पोषक तत्व डेहठ । प्रतिरक्षा प्रणाली बल्गर बनैटी डाइक दूधमे एन्टिबडी रहठ जिहीसे लर्कनहे रोगसे जोगाइठ ।
डाइक दुध सुरक्षित ओ पचैना सजहुल रहठ । ओ लर्कनहे डायरिया वा एलर्जी हुइना सम्भावना कम रहठ । स्नायु विकासमे सहयोगीके भ्ुमिका खेलठ । डाइक दूधसे मस्तिष्कके मजा विकासमे मद्दत करठ ।
ओस्टेक करके डाइक लाग फाइदामे गर्भपाछेक रिकभरी करठ । स्तनपानसे गर्भाशयहे हाली छोट हुइना मद्दत करठ ओ रक्तस्राव कम करठ ।
गर्भनिरोधकके रूपमे काम करठ । नियमित स्तनपानसे कुछ समय गर्भ रनासे जोगाई सेकठ ।
क्यान्सरके जोखिम कम करठ । स्तनपान करैना महिलामे स्तन ओ अण्डाशयके क्यान्सरके सम्भावना कम हुइठ ।
तौल घटैना मद्दत करठ । स्तनपानसे क्यालोरी जरैना हुइल ओरसे तौल कम कैना सहयोग करठ ।
सामाजिक ओ आर्थिक फाइदाः
सस्ता ओ सुलभ डाइक दूध निःशुल्क रहठ । जौन आर्थिक रूपमे लाभदायक रहठ । सदा उपलब्ध हुइना करठ । यी हरेक समय, हरेक स्थानमे उपलब्ध रहठ ।
