चन्द्रोदय माविहे शैक्षिक सामग्री हस्तान्तरण
पहुरा समाचारदाता
धनगढी, २३ सावन । धनगढी उपमहानगरपालिकासे वडा नम्बर १८ मे रहल चन्द्रोदय माध्यमिक विद्यालयहे शैक्षिक सामग्री हस्तान्तरण करले बा ।
सामुदायिक विद्यालय शैक्षिक गुणस्तर सुधार कार्यक्रम अन्तर्गत शुकके विद्यालयके बालविकास कक्षाके लाग आवश्यक सामग्री हस्तान्तरण करल हो । विद्यालयमे आयोजित कार्यक्रममे नगर प्रमुख गोपाल हमाल, वडा अध्यक्ष भुवन रिजाल, शिक्षा महाशाखा प्रमुख घुम्मनसिंह बडायक, विद्यालय व्यवस्थापन समितिके अध्यक्ष सुरज परियार, प्रधानाध्यापक केशव सिंह भाट, शिक्षक, अभिभावक तथा स्थानीयवासीके उपस्थिति रहे ।
उपमहानगरपालिकासे बालविकास कक्षाके विद्यार्थीहुकनके लाग क, ख म्याट, पिफम, कुर्सी, टेबल, कार्पेट, एबीसी म्याट, अंक म्याट, जुत्ता–चप्पल राख्ने र्याक, सेतोपाटी, हर्स रकर, हेन रकर, डक रकर लगायतके खेल सामग्री उपलब्ध कराइल हो । सामग्री वडा अध्यक्ष भुवन रिजाल ओ शिक्षा महाशाखा प्रमुख घुम्मनसिंह बडायक विद्यालय व्यवस्थापन समितिके अध्यक्ष सुरज परियार ओ प्रधानाध्यापक केशव सिंह भाटहे हस्तान्तरण करल हुइट ।
कार्यक्रममे बोल्टी नगर प्रमुख हमाल चन्द्रोदय मावि ‘नमुना विद्यालय’ घोषणा करके आवश्यक लगानी करलेसेफे शैक्षिक उपलब्धीमे अपेक्षित सुधार नैआइलप्रति असन्तुष्टि जनैलै । उहाँ अभिभावक, शिक्षक ओ विद्यालय व्यवस्थापन समितिहे विद्यार्थीके सिकाइ उपलब्धी ओ भर्ना संख्या बह्रैना ठप मेहनत कैना आग्रह करलै । हमाल कहलै, “सामुदायिक विद्यालयमे आवश्यक सक्कु सहयोग कैना उपमहानगर तयार बा, मने गुणस्तरमे सुधार ओ विद्यार्थी भर्ना दर भर बह्राई परठ ।” उहाँक अनुसार सामुदायिक विद्यालयके गुणस्तर सुधार कैना भौतिक पूर्वाधार ओ शिक्षकमे लगानी कैना उपमहानगर तयार बा ।
मने, अइना शैक्षिक सत्रमे बालविकास कक्षा, कक्षा ८ ओ एसइईके नतिजामे सुधार नैआइल नमुना विद्यालयके सुविधा कटौती कैना चेतावनीफे उहाँ डेलै । हाल विद्यालयके बालविकास कक्षामे जम्मा १० जाने केल्ह विद्यार्थी बटै । यी संख्या बह्ुट कम रहल कहटी हमाल असन्तुष्टि व्यक्त करटी कहलै, “अइना वर्ष ५० जाने बालबालिका भर्ना हुइलेसे कक्षामे एसी जडान कैना ओ शिक्षक संख्या समेत बह्रैबी ।”
वडा अध्यक्ष भुवन रिजाल ओ विद्यालय व्यवस्थापन समितिके अध्यक्ष सुरज परियारसेफे विद्यालयके शैक्षिक गुणस्तर सुधारके लाग अभिभावक ओ शिक्षकहुकनसंग मिल्के प्रयास कैना प्रतिबद्धता जनैलै ।
