कैलाली कारागारमे मारपिटौवर हुके एक जानेक मृत्यु, ४७ जाने घाहेल
पहुरा समाचारदाता
धनगढी, २४ सावन । कैलाली जिल्ला कारागारमे गैल रात मारपिटौवर हुके १ जानेक मृत्यु हुइल बा कलेसे ४७ जाने घाहेल हुइल बटै ।
शुकके रात ११ बजेक समयमे मारपिटौवर हुईबेर धनगढी–४ के भरत चौधरीके मृत्यु हुइल जिल्ला प्रहरी कार्यालय कैलालीके प्रवक्ता डिएसपी राजकुमार सिंह जनैलै ।
उ घटनामे जोरसे घाहेल हुइल चौधरीहे उपचारके लाग सेती प्रादेशिक अस्पताल पुगाइल रहे, हुकान उहे मृत्यु हुइल हो । मृतक ४० वर्षीय चौधरी लागुऔषध मुद्दामे थुनामे रहिट ।
उ घटनामे घाहेल ४७ मन्से ३ जानेक अवस्था गम्भीर रहल प्रहरी जनैले बा । विफेक रोजफे मारपिटौवर हुईबेर ५ जाने घाहेल हुइल रहिट ।
कैलाली कारागारमे हुइल मारपिटौवरमे परके घाहेल हुइल अवस्था बुझ्न राष्ट्रिय मानव अधिकार आयोगके टोली पुगल बा ।
सुदूरपश्चिम कार्यालय प्रमुख प्रकाशदत्त भट्ट घाहेलके अवस्था बुभना परिवारसे भेटे नैपाइल उपचारबारे जानकारी नैहुइल गुनासो आइलपाछे आयोग पुगल हो ।
जेलके पछिल्का अवस्था बुझ्न जिल्लाके चारु सुरक्षा निकायके प्रमुख जिल्ला अधिकारी, नेपाल प्रहरी, सशस्त्र प्रहरी, नेपाली सेना ओ राष्ट्रिय अनुसन्धानके प्रमुखहुक्रे पुगल बटै । १५० कैदीबन्दी क्षमता हुइल ७०० बन्दी बटै ।
