छानविनके लाग दुई ठो अलग अलग समिति गठन
पहुरा समाचारदाता
धनगढी, २५ सावन । कैलाली जिल्ला कारागारमे गैल शुकके रात एक जानेक मृत्यु ओ ४९ जान घाहेल हुइल घटनाके छानविनके लाग अलग अलग दुई ठो समिति गठन हुइल बा ।
जिल्ला प्रशासन कार्यालय कैलालीसे अँटवारके रोज सहायक प्रमुख जिल्ला अधिकारी किरण जोशीके संयोजकत्वमे पाँच सदस्यीय छानबिन समिति गठन कैगिल बा ।
समितिके सदस्यमे नेपाल प्रहरीके डीएसपी राजकुमार सिंह, सशस्त्र प्रहरीके डीएसपी जनकराज पन्त, अनुसन्धान अधिकृत दीपेन्द्र सिंह ओ जिल्ला प्रशासन कार्यालयके प्रशासकीय अधिकृत शिवराज जोशी सदस्य सचिव रहल छानबिन समिति गठन हुइल प्रमुख जिल्ला अधिकारी गोगनबहादुर हमाल जनैलै ।
उ घटनासे कारागार भिटर शान्ति सुरक्षामे चुनौती डेखल ओरसे यी घटनाके यथार्थ ओ आवश्यक छानविन करेक लाग सहायक प्रमुख जिल्ला अधिकारीके संयोजकत्वमे पाँच सदस्यीय छानबिन समिति गठन करल उहाँ बटैलै ।
ओस्टेक करके उ घटनाके सत्यतथ्य पत्ता लगैना इन्सेकके नेतृत्वमे इन्सेक सुदूरपश्चिम प्रदेश संयोजक खडकराज जोशी ओ प्रलेख अधिकृत कृष्णबहादुर विश्वकर्मा, नेपाल पत्रकार महासंघके महासचिव शिवराज भट्ट, कैलाली जिल्ला अदालत बार एसोशियशनके अध्यक्ष इन्द्रप्रसाद लेखक, महिला मानव अधिकार रक्षक सञ्जालके गीता चौधरी, एडभोकेसी फोरमके पुष्पविक्रम शाही ओ मानव अधिकार रक्षक सञ्जालके संयोजक देवीप्रसाद खनाल सहित सात सदस्यीय तथ्य संकलन समिति समेत गठन करल बा ।
घटनाके सत्यतथ्य पत्ता लगैना गठन करल इन्सेकलगायतके संघसस्थाके सयुक्त टोली सावन २६ गतेसे अध्ययन सुरु कैना ओ अध्ययनके क्रममे प्राप्त तथ्यके आधारमे प्रतिवेदन तयार करके सम्बन्धित निकायमे पेश करके सार्वजनिक कैना इन्सेक सुदूरपश्चिम प्रदेश कार्यालय, धनगढीके संयोजक खड्कराज जोशी बटैलै ।
इन्सेकलगायतके संघसस्थासे अँटवार प्रेस विज्ञप्ती जारी करटी जिल्ला कारागार कैलालीमे कैदीबन्दीहुकनके बीच हुइल झडपमे परके मृत्यु हुइल एक जाने व्यक्तिके परिवारहे क्षतिपूर्ति ओ घाहिल हुइलके निःशुल्क उपचारके व्यवस्था कैना माग करले बटै ।
घटनाके प्रारम्भीक स्थलगत निरीक्षणके क्रममे घाहिल ओ घाहिलके परिवारजनसे प्राप्त जानकारी अनुसार सुरक्षा ओ प्रशासनके चरम लापरबाहीके कारण उ घटना हुइल ठहर करटी घटनामे मृत्यु हुइल व्यक्तिके परिवार ओ घाहिलहुकनके निशुल्क उपचार कैना विज्ञप्तिमे उल्लेख करल बा ।
विज्ञप्तीमे कहल बा–,‘उ घटनामे परके मृत्यु हुइल व्यक्तिप्रति हार्दिक श्रद्धाञ्जली व्यक्त करटी शोक सन्तप्त परिवारजनमे समवेदना व्यक्त करटी । घाहिलके शीघ्र स्वास्थ्य लाभके कामना करटी मृतकके परिवारहे उचित क्षतिपूर्ति उपलब्ध करैना ओ घाहिलहुकनके अवस्था बारे आफन्तहे जानकारी करैना सम्बन्धित पक्षके ध्यानाकर्षण कराइटी ।’
घाहिलके उपचारके सक्कु जिम्मा सरकारसे लेके आवश्यक उपचार करेपर्ना ओ घटनाके सत्यतथ्य छानबिनके लाग मानव अधिकारकर्मी ओ नागरिक समाजके समेत प्रतिनिधित्व हुइना करके उच्चस्तरीय छानबिन समिति गठन करेपर्ना, कारागारमे क्षमतासे अत्याधिक ढेर कैदीबन्दी राखल कारणफे यी मेरिक घटना दोहरैना हुइल ओरसे आवश्यक भौतिक संरचना निर्माण करके कैदीवन्दीहुकनके मानव अधिकारके संरक्षण ओ सम्वर्धन कैना विज्ञप्तीमार्फत माग करल बा ।
सावन २३ गते रातके कारागार कार्यालय, कैलालीमे कैदीबन्दीहुकनबीच उत्पन्न हुइल झडपमे ३६ वर्षके भरत चौधरीके मृत्यु हुइल रहे कलेसे ४९ जाने कैदीबन्दी घाहिल हुइल बटै । घाहिलहुकनके सेती प्रादेशिक अस्पताल धनगढीमे उपचार हुइटी रहल बा ।
घटनाके पुनरावृत्ति रोकथाममे लाग ओ कारागारमे शान्ति, सुरक्षा ओ सुव्यवस्था कायम होए कहिके कारागारमे विद्यमान सुरक्षा चुनौतीके समग्र समीक्षा ओ मूल्याङ्कन करके जिल्ला प्रहरी कार्यालय, सशस्त्र प्रहरी बल ओ कारागार विभागबीच आवश्यक समन्वय, सहयोग ओ थप प्रभावकारी सुरक्षा व्यवस्था मिलाइल प्रजिअ हमाल बटैलै ।
यी सम्बन्धमे जिल्ला सुरक्षा समिति कैलालीफे पूर्ण सतर्कता ओ प्रतिबद्धताके साथ सम्बद्ध निकायहे आवश्यक निर्देशन तथा सहयोग करटी रहल बा ।
घाहिल तथा अन्यत्र उपचार आवश्यक पर्ना कैदीबन्दीहुकनके स्वास्थ्य सुरक्षा सुनिश्चित कैना कारागार विभागसँग समेत समन्वय हुइटी रहल उहाँ जनैलै । उहे सम्वन्धमे गम्भीर प्रकृतिके घाहिल कैदीवन्दीहुकनहे सम्वन्धित अस्पतालके सल्लाहमे सुविधा सम्पन्न अस्पतालसँग समन्वय करके यथाशीघ्र उपचारके लाग आवश्यक व्यवस्था मिलाउने करके आवश्यक समन्वय हुइटी रहल प्रजिअ जनैलै ।
ओस्टेक करके तनावग्रस्त कैलाली कारागारमे रहल कैदीबन्दीके संख्या यकिन कैना गणना सुरु करल बा । शनिच्चरसे कारागारके जिम्मेवारी सम्हारल जेलर जालन्धर भुसाल प्रत्येक कैदीहे बोलाके संख्या गणना करे लागल हुइट ।
जिल्ला प्रशासन कार्यालयके सूचना अधिकारी शिवराज जोशीके अनुसार, प्रत्येकके अनुहार हेरटी जेलरके नेतृत्वमे कैदीबन्दीके गणना हुइटी रहल हो ।
